ԱՄՆ սննդի և դեղամիջոցների վարչությունը հաղորդում է, որ ԱՄՆ-ի դեղատներում հայտնաբերվել են քաղցկեղի բուժման համար օգտագործվող թանկարժեք Avastin դեղամիջոցի կեղծ տարբերակները: Դեռևս հայտնի չէ, թե արդյոք այս կեղծ դեղամիջոցից որևէ հիվանդ օգտվե՞լ է, թե՞ ոչ:
Forbes-ը հաղորդում է, որ վաղուց ժամանակն է, որ լրատվամիջոցներն ուշադրութուն դարձնեն այս խնդրին, քանի որ այն չափազանց կարևոր է հանրային առողջության համար:
2010 թվականին H1N1 գրիպի համաճարակի տարածման ժամանակ ԱՄՆ կառավարությունը քաղաքացիներին զգուշացրել էր, որ վաճառվում են կեղծ վնասակար դեղամիջոցներ, որոնք իբրև թե պետք է պաշտպանեին գրիպից: Բայց դրա մեջ ոչ մի գրիպը կանխարգելող նյութ չի եղել, այլ այն պարունակել է միայն պենիցիլին, որն իրականում վնասակար է որոշ մարդկանց համար:
Միևնույն տարում ԱՄՆ-ում տարածվել էին լուրեր այլ կեղծ դեղամիջոցների մասին: Նման լուրերի պատճառով քաշի նվազեցմանն ուղղված Meridia դեղամիջոցը հանվեց շուկայից:
Իրականում այս բոլոր դեպքերն իրարից մեկուսացված չեն: Թվում է, թե դեղ օգտագործելը պետք է որ հեռացնի ցավն ու առողջական խնդիրները, բայց այժմ երբեք հնարավոր չէ հաստատ համոզված լինել, թե իրականում ինչ դեղ ենք խմում:
Առողջապահության համաշխարհային կազմակերպությունը հաշվարկել է, որ աշխարհի դեղամիջոցների մատակարարման 10-15 տոկոսը, իսկ ԱՄՆ-ում 30 տոկոսը կեղծ է:
