РБК-ի փոխանցմամբ՝ Ռուսաստանում Իրանի դեսպան Մուհամեդ Ռեզա Սաջադին հայտարարել է, որ ժամանակավորապես հետաձգվել է դեպի ԵՄ իրանական նավթի արտահանման վրա արգելք դնելը: Նա չի հայտնել, թե կոնկրետ երբ դա տեղի կունենա.
«Մեջլիսը (Իրանի խորհրդարան) մտադիր էր ընդունել եվրոպական երկրներին նավթի մատակարարումն արգելող օրենք՝ կապված իրանական նավթի վրա ԵՄ-ի սահմանած բեռնարգելքի հետ, որն ամբողջովին ուժի մեջ է մտնելու հուլիսի 1-ից:
Սակայն Իրանի կառավարությունը, ելնելով մարդասիրական նկատառումներից, ինչպես նաև հաշվի առնելով Եվրոպայում տիրող սառը ձմեռը, դիմել է խորհրդարանին՝ ժամանակավորապես այդ արգելքը հետաձգելու համար: ԵՄ-ը էներգետիկան օգտագործում է քաղաքական նպատակներով: Դա չի բխում նրա ժողովուրդների շահերից»:
Հիշեցնենք, որ իրանական Press TV հեռուստաալիքը երեկ հայտնել էր, որ Իրանը դադարեցրել է եվրոպական 6 երկրներին (Հունաստան, Իտալիա, Իսպանիա, Պորտուգալիա, Նիդերլանդներ և Ֆրանսիա) իր նավթի մատակարարումը: Ավելի ուշ դա հերքվեց Իրանի նավթարդյունաբերության նախարարության կողմից: