«Մենք ենթարկվում ենք դիվանագիտական, քաղաքական և տեղեկատվական պատերազմի»,- փետրվարի 15-ին Մոսկվայում ասել է Սիրիայի դեսպան Ռիյադ Մուհամմեդ Խադադը՝ «Ճգնաժամը Սիրիայում. կարգավորման ճանապարհները և այդ գործընթացում միջազգային հանրության հնարավոր մասնակցությունը» թեմայով մամլո ասուլիսի ժամանակ: Այս մասին տեղեկացնում է ИА REGNUM-ի թղթակիցը:
«Դրսից միջամտությունը ելք չէ: Մենք համաձայն ենք բարեփոխումների, մենք պատրաստ ենք նոր սահմանադրության նախագիծ քննարկել: Սիրիայում արդեն իսկ աշխատում են 6 քաղաքական կուսակցություններ: Ինչ վերաբերում է զինված խմբավորումներին, ապա մենք նրանց կհետապնդենք: Ժողովուրդը և բանակը համերաշխ են մեր պետության հետ»,- ընդգծել է Խադադը:
Դեսպանը հատուկ ուշադրություն է դարձրել Սիրիայի դեմ տեղեկատվական պատերազմին «Գլխավորը տեղեկատվական պատերազմը դադարեցնելն է: Այն ինչ ասում են շատ ԶԼՄ-ներ Սիրիայի մասին, 90 %-ը կեղծիք է: Այն պահից ի վեր, ինչ ես Ռուսաստանում աշխատում եմ որպես դեսպան, հաճախ եմ նայում «Ալ-Արաբիան» և «Ալ-Ջազիրան»: Տեսնում եմ, թե ինչ են հաղորդում այդ երկու հեռուստաալիքներով: Զանգահարում եմ Դամասկոս, և ինձ ասում են, որ ամեն ինչ այդպես չէ»:
Հիշեցնենք, որ հունվարի վերջից սիրիական կառավարությունը պատրաստում է բարեփոխումների փաթեթ` կապված պետության քաղաքական և տնտեսական կյանքի հետ: Բարեփոխումների գլխավոր ուղղությունը կլինի կոռուպցիայի դեմ պայքարը, խոսքի ազատության և տպագրության սահմանափակումների կրճատումը, և ընդդիմադիր կուսակցություններն ընտրություններին մասնակցելու իրավունք կունենան:
