Գերմանիայի հեղինակավոր Peter Lang հրատարակչությունում տպագրվել է «Ստեղծարար: Հեյդար Ալիև` որպես անձնավորություն և պետական գործիչ» գիրքը`նվիրված Ադրբեջանի նախկին նախագահ Հեյդար Ալիևի կյանքին և գործունեությանը: Ինչպես հաղորդում է 1news.az-ը, հղում անելով АзерТАдж-ին, գրքում, որի հեղինակը գերմանացի գիտնական Իոհաննես Ռաուն է, Հեյդար Ալիևը բնորոշվում է որպես «հանճարեղ անհատականություն», ժամանակակից անկախ Ադրբեջանի ստեղծող, ներկայացվում է նրա գործունեությունը` որպես ականավոր քաղաքական և պետական գործիչ:
Գրքում վերլուծվում է այն միջավայրը, որտեղ մեծացել է Ադրբեջանի «համազգային առաջնորդը»: Նշվում է այդ միջավայրի ազդեցությունը նրա՝ որպես առաջնորդի ձևավորման վրա: Հեղինակը պատմում է, թե ինչպես սովորական ադրբեջանական ընտանիքի զավակը բարձրացավ նախկին սովետական իշխանության գագաթին, ներկայացվում են նաև այդ դժվարին ճանապարհին նրա ձեռք բերած հաջողությունները:
Բացի այդ, ընթերցողի ուշադրությանն են ներկայացվում նաև Ալիևի այնպիսի առանձնահատկությունները, ինչպիսիք էին ամուր կամքն ու հեռատեսությունը: «Նա վայելում էր ժողովրդի վստահությունը»,- գրված է գրքում:
