Բոսնիա և Հերցեգովինայի մայրաքաղաք Սարաևոյում չորեքշաբթի տեղի է ունեցել հոլիվուդյան դերասանուհի Անջելինա Ջոլիիի նոր ֆիլմի`«Արյան ու մեղրի երկրում», փակ դիտումը: Այս մասին հաղորդում է Associated Press գործակալությունը:
Ժապավենը ցուցադրվել է Խուան Անտոնիո Սամարանչի անվան սառցե դղյակում, որտեղ ավելի վաղ անցկացվել են 1984 թ. ձմեռային օլիմպիադայի մրցումները:
Ֆիլմի ավարտից հետո հանդիսատեսը ծափերով է ողջունել այն, գրում է գործակալությունը: Ի դեպ, այն Ջոլիի առաջին ֆիլմն է որպես ռեժիսոր ու սցենարիստ:
Ջոլին սերբերենով դիմել է դահլիճում գտնվող 5000-անոց հանդիսատեսին: «Ինձ համար շատ կարևոր էր իմ տպավորությունները հաղորդել ձեզ»,- ասել է նա:
Երեքշաբթի ցերեկը Ջոլին Սարաևո է ժամանել ամուսնու` Բրեդ Փիթի, ինչպես նաև ֆիլմում նկարահանված դերասանների հետ:
Ինչպես ավելի վաղ հաղորդել էր սերբական Танюг գործակալությունը, ֆիլմի ցուցադրմանը Սարաևո էին հրավիրվելու միայն Բոսնիա և Հերցեգովինայի պատերազմի զոհեր ասոցիացիայի անդամները, ընդ որում՝ հաղորդվում էր, որ Ջոլին գնել է երկու հազար հարյուր տոմս ու դրանք որպես բարի կամքի դրսևորում բաժանել ռազմական գործողությունների մասնակիցներին:
«Արյան ու մեղրի երկրում» ֆիլմը Բոսնիա և Հերցեգովինայի քաղաքացիական պատերազմի մասին է: Այն պատմում է մուսուլմանուհի Ալեի մասին, որը սեքսուալ բռնության է ենթարկվում իրեն հսկող սերբերի կողմից: Բանտի պահապաններից մեկը ի դեմս նրա ճանաչում է իր երբեմնի հարսնացուին:
