Այսօր լրագրողների հետ հանդիպման ժամանակ «Հասարակական քաղաքական հետազոտությունների կենտրոն»-ի նախագահ Զորիկ Մարտիկյանը ներկայացրեց հունվարի 20-ից փետրվարի 9-ը կատարված հարցման արդյունքները:
Հարցումն իրականացվել է Երևան քաղաքի բոլոր համայնքներում՝ պատահական ընտրանքի եղանակով:
Հարցման մասնակիցների 70%-ը կին է, 21%-ը հիմնական աշխատանք չունի, մասնավոր սեկտորի աշխատողները կազմում են 42%, պետական աշխատողները և քաղծառայողները՝ 20%, ուսանողները` 17%:
Հարցման մասնակիցների 68%-ը ունի բարձրագույն կրթություն կամ բուհերի բարձր կուրսերի ուսանողներ են, 19%-ն ունի միջնակարգ կրթություն, 13%-ը՝ տեխնիկական: Հարցմանը մասնակցել են 19 % 18-25 տարեկաններ, 26-35 տարեկաններ՝ 23%, 36-50 տարեկաններ՝ 32%, և 51-ից բարձր տարիքի մարդիկ՝ 26 %:
Հարցվածների ամսական եկամուտը մինչև 60 հազար դրամ է՝ 39%, 60-ից 100 հազար դրամ՝ 42%, 100-200 հազար դրամ՝ 18%, 200 հազարից ավելի՝ 1%: Հարցվածներից ոչ մեկը կուսակցական պատկանելություն չունի:
Այն հարցին, թե մասնակցելո՞ւ են գալիք ԱԺ ընտրություններին, դրական է պատասխանել միայն 21%-ը, բացասական՝ 45%-ը, դեռ չի որոշել` 34 %-ը: Հարցվածների 34%-ն է միայն հավատում արդար ընտրություններին:
Այն հարցին, թե ո՞ր կուսակցությանն են տալու իրենց ձայնը, 26%-ը պատասխանել է ՀՀԿ-ին, 21%-ը՝ ԲՀԿ-ին, 14%-ը՝ ՕԵԿ-ին, 11%-ը՝ ՀԱԿ-ին, 9%-ը՝ ՀՅԴ-ին, 7%-ը՝ «Ժառանգությանը», իսկ այլ՝ 12%:
Լրագրողների հարցին՝ ինչո՞ւ է բավական մեծ տոկոսային զանգված բաժին ընկել ՕԵԿ-ին, Զ. Մարտիկյանը բացատրեց, որ ամենայն հավանականությամբ հարցվածները գնահատում են ՕԵԿ անդամ նախարարների գործունեությունը:
Հարցվածների 35%-ը լավ է վերաբերվում է ԱԺ-ում գործարար պատգամավորների առկայությանը, 42%-ըվատ է վերաբերվում, իսկ 23%-ի համար միևնույն է:
Մեծամասնական և համամասնական ընտրակարգին կողմ է 37%-ը, իսկ միայն համամասնականին կողմ է 63 %-ը:
Հարցին, թե ինչ սկզբունքով են հարցվածներն ընտրում այս կամ այն կուսակցությանը, 32%-ը պատասխանել է՝ ընտրում են՝ առաջնորդվելով կատարած աշխատանքով, 21%-ը` հաշվի առնելով կուսակցության լիդերի նկատմամբ համակրանքը, 17%-ը` հաշվի առնելով կուսակցության նախընտրական ծրագիրը, 12%-ը` ինչ-որ մեկի խնդրանքով, 8%-ը՝ հաշվի առնելով կուսակցության գաղափարախոսությունը, 6%-ը՝ գումարի կամ խոստումի դիմաց, իսկ 4%-ը՝ այլ տարբերակ:
ԱԺ գործունեությունը շատ լավ է գնահատել 4%-ը, լավ` 17%-ը, միջին՝ 22%-ը, վատ՝ 39%-ը, իսկ շատ վատ՝ 18%-ը: Կառավարության գործունեությունը շատ լավ է գնահատում 11%-ը, լավ` 23%-ը, միջին` 14%-ը, վատ`33%-ը, շատ վատ` 19%-ը:
Ոստիկանության գործունեությունը շատ լավ է գնահատել հարցվածների 29%-ը, լավ`49%-ը, միջին`14%-ը, վատ՝ 9%-ը, իսկ շատ վատ` 5%-ը:
Հարցվածների 32%-ը վատ է գնահատում ՀՀ կոռուպցիայի դեմ ընթացող պայքարի արդյունավետությունը: Հարցվածների 57%-ը քաղաքական բնույթի տեղեկություններ ստանում է հեռուստացույցից, իսկ 16%-ը՝ տպագիր մամուլից: Իսկ ավելի վստահելի աղբյուր հարցվածները համարում են տպագիր մամուլը:
«Հասարակական քաղաքական հետազոտությունների կենտրոն»-ի նախագահ Զորիկ Մարտիկյանն ասաց, որ հարցումն իրականացվել է տեղական կազմակերպություններից մեկի պատվերով:
«Մինչև ընտրությունները և exitpoll-ը ներկայացնելու ենք այլ հարցումներ նույնպես, որպեսզի ճշգրտենք հասարակության տրամադրությունները և քաղաքական նախընտրությունները»,- եզրափակեց Զ. Մարտիկյանը: