Ռուսական ВЗГЛЯД թերթի փոխանցմամբ` Ասիա-խաղաղօվկիանոսյան տարածաշրջանում (ԱԽՏ) Աբխազիայի հատուկ լիազորություններով դեսպան Յուրիս Գուլբիսն անդրադարձել է Աբխազիայի անկախության միջազգային ճանաչմանը.
«Եթե չլիներ ԱՄՆ-ի ու Մեծ Բրիտանիայի ճնշումը, նախորդ տարի նվազագույնը 20 երկրներ կճանաչեին Աբխազիայի անկախությունը: ԱԽՏ-ում քիչ չեն այնպիսի երկրները, որոնք անկախություն են նվաճել վերջին կես դարում, դրա համար էլ նրանք քաջ հասկանում են անկախության մեր ձգտումը:
ԱՄՆ-ը ու Մեծ Բրիտանիան ճնշումներ են բանեցնում այս կամ այն երկրի վրա, որպեսզի նրանք չճանաչեն Աբխազիայի անկախությունը: Չնայած դրան՝ կան հեռանկարներ, որ այս տարի տարածաշրջանի երկրները կճանաչեն Աբխազիայի անկախությունը: ԱԽՏ-ից Աբխազիայի անկախությունը ճանաչել են Նաուրուն, Վանուատուն ու Տուվալուն»:
Հիշեցնենք, որ վերջին շրջանում շարունակ լուրեր են շրջանառվում, թե Ֆիջին կարող է ճանաչել Աբխազիայի անկախությունը: Հենց դրան էր միտված օրեր առաջ Ռուսաստանի արտգործնախարար Սերգեյ Լավրովի այցը Ֆիջի:
