Բրիտանիայի մայրաքաղաքի քաղաքապետ Բորիս Ջոնսոնը, որին հազիվ թե օրինակելի մարզիկ անվանես, մտադիր է մինչև 2012 թ. Օլիմպիական խաղերի մեկնարկը հիանալի մարզավիճակ ձեռք բերել և իր սեփական օրինակով ցույց տալ, թե որքան օգտակար է սպորտով կանոնավոր զբաղվելը:
Ինչպես տեղեկացնում է The Evening Standard հրատարակությունը, քաղաքապետը հոկտեմբերից հատուկ ինտենսիվ ծրագրով մարզվում է իր անձնական մարզիչի ղեկավարության ներքո: Արդյունքները արդեն իսկ նկատելի են անզեն աչքով. Ջոնսոնը նիհարել է մոտ 6 կգ:
Վազքուղու քառորդ մասը Ջոնսոնը հաղթահարում է շաբաթական 2-3 անգամ, իսկ մնացած օրերին նրան սպասվում է լարված պարապմունք մարզադահլիճում, որտեղ 47-ամյա քաղաքապետը 100 հրում է կատարում:
Չպետք է մոռանալ նաև Ջոնսոնի վերջին նախասիրություններից մեկը` հեծանիվը: Լոնդոնի քաղաքապետը ամեն կերպ փորձում է մեծացնել հեծանվավազքի հանդեպ հետաքրքրությունը, և պետք է նշել, որ զգալի հաջողությունների է հասել: Արդեն մի քանի տարի է, ինչ նա աշխատանքի է գնում միայն իր հավատարիմ «պողպատե ձիով»:
Անցյալ տարի Ջոնսոնի նախաձեռնությամբ կյանքի կոչվեց մի ծրագիր, որն աջակցում է սպորտային սիրողական ակումբներին, նաև խթանում է ակտիվ հանգիստը: Ծրագրի իրականացման համար ծախսվեց 35 մլն ֆունտ սթեռլինգ (55 մլն դոլար):
