ՀՀ էկոնոմիկայի նախարար Տիգրան Դավթյանը «Հայկական ժամանակ» թերթի թողարկման պատասխանատու Հայկ Գևորգյանի ձերբակալության կապակցությամբ «Առաջին լրատվական»-ի հետ զրույցում կարծիք հայտնեց, որ պատահարը, ցավոք, շատ տհաճ է: Նա նշեց, որ դեպքին տեղյակ է, բայց մանրամասներին՝ դեռ ոչ. «Ես, ճիշտն ասած, մանրամասները չգիտեմ, երեկ ժամանակ էլ չեմ ունեցել, որ նայեմ: Իհարկե հաճելի չի ոչ մեկի համար՝ լրագրող, կամ ոչ լրագրող, ոչ մի տեսակետից և՛ պատահարը, և՛ հետևանքները»: Նախարարի խոսքով, կան կառույցներ, որոնք մանրամասն կուսումնասիրեն, կտան իրենց իրավական գնահատականը:
Այն դիտարկմանը, որ Facebook սոցիալական ցանցում բավականին բուռն քննարկումներ են ծավալվել, և այդ դեպքը դիտարկվում է որպես Վովա Գասպարյանի կողմից վրեժ Հայկ Գևորգյանի հանդեպ` հոդվածների համար, Տ. Դավթյանը պատասխանեց, որ հստակ փաստերը պետք է նայվեն, որից հետո միայն հետևություններ արվեն, իսկ փաստերը… հատուկ մասնագիտացված մարդիկ կան, որոնք պրոֆեսիոնալ զբաղվում են: «Կրկնում եմ՝ շատ ոչ դյուրին իրավիճակ է»,- ասաց Դավթյանը:
Հարցին՝ կաջակցե՞ք արդյոք, լավ ճանաչելով Հայկ Գևորգյանին, ով պնդում է, որ անմեղ է, Տ. Դավթյանը արձագանքեց, որ այս կամ այն կողմի պնդումները իմաստ չունեն: «Կան համապատասխան մասնագիտական կառույցներ, որոնք այդ խնդիրն ունեն, ինչպես մնացած բոլոր դեպքերում կարվի այն ընդհանուր մոտեցումներում, որ արվում է ցանկացած այլ դեպքի կապակցությամբ: Խտրական մոտեցում չպետք է լինի: Разберутся-скажут»,- հայտարարեց Դավթյանը:
