ՀՀ ԱԳՆ–ը հայտնում է, որ փետրվարի 4–ին Մյունխենում Էդվարդ Նալբանդյանի հաջորդ հանդիպումը Եգիպտոսի արտգործնախարար Մոհամեդ Քամլ Ամրի հետ էր:
Նախարար Նալբանդյանը ցավակցություններ է հայտնել օրերս Եգիպտոսի Պորտ Սաիդ քաղաքում ֆուտբոլային երկրպագուների ընդհարման արդյունքում զոհերի կապակցությամբ:
Նախարարները երկուստեք նշել են հայ-եգիպտական դարավոր հարաբերությունների ավանդական բարեկամական բնույթը և անդրադարձել են դրանց զարգացման, տնտեսական փոխգործակցության խթանման, մշակութային փոխանակումների ակտիվացման, իրավապայմանագրային դաշտի ընդլայնման, միջազգային կառույցների շրջանակներում համագործակցության հարցերին:
Էդվարդ Նալբանդյանն ընդգծել է, որ Հայաստանը մշտապես լավ և ամուր հարաբերություններ է ունեցել Եգիպտոսի և արաբական աշխարհի հետ և շարունակելու է դրանց առավել ամրապնդման ուղղությամբ քայլերը:
Տնտեսական համագործակցության ընդլայնման շուրջ քննարկումների ժամանակ նախարարները նշել են, որ երկրների միջև ուղիղ չվերթները կնպաստեն թե տնտեսական կապերի, թե զբոսաշրջության խթանմանը և պայմանավորվել են ուսումնասիրել ուղիղ ավիակապ հաստատելու հնարավորությունը:
Նախարար Ամրը ներկայացրել է Եգիպտոսում տեղի ունեցող իրադարձությունները, անցումային կառավարության կողմից երկրում անվտանգության ապահովման ուղղությամբ ձեռնարկվող քայլերը:Այս առումով նախարար Նալբանդյանն ասել է. «Եգիպտոսի հազարամյա պատմության մեջ, ներկայիս անցումային փուլն ընդհամենը մի դրվագ է և, վստահաբար, Եգիպտոսի ժողովուրդը կհաղթահարիբոլոր դժվարությունները, ինչպես դա բազմիցս արել է իր պատմության ընթացքում»:
Նախարար Նալբանդյանի մյունխենյան օրակարգը ներառում էր հանդիպում նաև Սերբիայի ԱԳ նախարար Վուկ Յերեմիչի հետ:
Հայաստանի և Սերբիայի արտաքին քաղաքական գերատեսչությունների ղեկավարների հանդիպմանն անդրադարձ է կատարվել միջազգային կազմակերպություններում փոխգործակցության հարցերին:
