Փետրվարի 4-ին, ժամը 17:00-ին, Գյումրիում մի խումբ երիտասարդներ կազմակերպել էին բողոքի ակցիա՝ ընդդեմ քաղաքային իշխանությունների: Ակցիայի մասնակիցները պահանջում էին մաքրել սառցակալած փողոցներն ու մայթերը: Երթը սկսվեց Գյումրիի թիվ 10 դպրոցից և ավարտվեց քաղաքապետարանի մոտ: Յուրաքանչյուրն իր հետ վերցրել էր մի քանի տուփ աղ, և ամբողջ երթի ընթացքում այն լցնում էին սառցակալած փողոցներին և մայթերին:
Հարցին, թե ինչու են որոշել կազմակերպել նման ակցիա, երիտասարդներից մեկը նշեց. «Քանի որ ակամայից դարձել ենք էքստրիմի սիրահար այս փողոցներում և տեսնում ենք, թե ինչպես է անտերության մատնված. այս կերպ փորձում ենք ազդել պաշտոնատար անձանց վրա և պահանջել մեր քաղաքի բնակիչների համար անվտանգ փողոցներ»:
Ամբողջ երթի ընթացքում երիտասարդներին ողջունում և շնորհակալություն էին հայտնում անցորդները, ինչպես նաև վարորդները:
Հասնելով քաղաքապետարանի մոտ՝ նրանք շենքի շրջակայքը նույնպես լցրեցին աղով, իսկ հետո աղի տուփերը, համապատասխան կոչերի ցուցանակներով, կախեցին քաղաքապետարանի դռներին: Սակայն դրանք երկար կախված չմնացին: Քաղաքապետարանի աշխատակիցը դուրս եկավ և հայհոյելով, պատառոտելով տուփերը և աղտոտելով շրջակա միջավայրը՝ փորձեց երիտասարդներին սանձել և վտարել իրենց իսկ քաղաքի հրապարակից: Երիտասարդ ակտիվիստները հավաքեցին քաղաքապետարանի աշխատակցի կողմից պատառոտված և ամբողջ տարածքով մեկ տարածած աղբը՝ նշելով. «Մենք քաղաքապետարանի նման «խոզ» չենք, մենք սիրում ենք մեր քաղաքը»:
Մանրամասն՝ Հայկ Բարսեղյանի պատրաստած տեսանյութում
