Մոսկվայում սկսվել է «Հանուն արդար ընտրությունների երթը» դեպի Բոլոտնայա հրապարակ:
Ակցիան համաձայնեցված է քաղաքի իշանությունների հետ, դրան կարող է մասնակցել 50 հազար մարդ: Մոսկվայի ՆԳՆ պետական վարչության տվյալներով, Կալուժսկայա հրապարակում, որտեղից սկսվել է երթը, հավաքվել է 15,500 մարդ: Մինչդեռ Новая газета թերթի թղթակիցը Twitter-ի իր էջում գրում է, որ հավաքվածների թիվը հասնում է 40 հազարի:
Երթին մասնակցում են ինչպես կազմակերպված քաղաքական և հասարակական շարժումներ, այնպես էլ անհատ քաղաքացիներ:
Նախատեսվում է, որ Բոլոտնայա հրապարակում ցույցը կշարունակվի մինչև ժամը 16:00-ն: Ցույցի ժամանակ ելույթ կունենան գրող Լյուդմիլա Ուլիցկայան, լրագրող Լեոնիդ Պարֆյոնովը, իրավապաշտպան Իրինա Յասինան:
Միաժամանակ Մոսկվայում տեղի է ունենում «հականարնջագույն» ցույց՝ ի աջակցություն երկրի իշխանությունների: Ըստ РИА Новости-ի տեղեկությունների, որը մեջբերում է ոստիկանության տվյալները, հանրահավաքին մասնակցում է շուրջ 56 հազար մարդ: Սակայն լրագրողների տվյալներով՝ այդ թիվը չափազանցված է:
