Իսրայելական Haaretz թերթի փոխանցմամբ՝ ամերիկացի գրող Պոլ Օսթերը պատասխանել է Թուրքիայի վարչապետ Ռեջեփ Էրդողանին, ով Օսթերին քննադատել էր Թուրքիա կատարելիք այցը բոյկոտելու և փոխարենը իսրայելական այցը չբոյկոտելու համար.
«Թուրքիայի վարչապետ Էրդողանը կարող է Իսրայելի մասին մտածել այն, ինչ ցանկանա: Սակայն այդ երկրում գոյություն ունի խոսքի ու կամարտահայտության լրիվ ազատություն: Մինչդեռ համաձայն PEN-ի (Միջազգային լրագրողական միություն), Թուրքիայի բանտերում են գտնվում 100 լրագրողներ ու գրողներ: Սրանք պաշտոնական տվյալներ են:
Յուրաքանչյուր երկրում կարող են լինել որոշակի թերություններ: Դա մասնավորապես վերաբերում է թե՛ Թուրքիային, թե՛ ԱՄՆ-ին: Դրանք կարելի է և պետք է ուղղել: Սակայն ժողովրդավարության ու ազատության հիմնական ու կարևորագույն արտահայտումը խոսքի ազատությունն է: Այն լիովին գործում է Իսրայելում»:
Հիշեցնենք, որ Օսթերի կողմից թուրքական այցի բոյկոտից հետո Էրդողանը հայտարարել էր. «Դու ոչինչ չգիտես, ու դու հիմար ես: Քեզ թվում է, թե Իսրայելը ժողովրդավարական երկիր է, որտեղ ազատ խոսքի իրավունք ու անհատի ազատություն գոյություն ունի, իսկ իրականում ռմբակոծում են Գազան, կիրառում են ֆոսֆորային ռումբեր ու քիմիական զենք:
Եթե մարդը, որը կույր է ու չի նկատում իր քթի տակ կատարվածը և մեզ բոյկոտ է հայտարարում, դա շատ լուրջ ու անհարգալից դրսևորում է Թուրքիայի հանդեպ: Ո՞ւմ է ընդհանրապես հետաքրքրում` կգաս դու մեզ մոտ, թե չէ: Եվ, ընդհանրապես, ով գիտի, թե դու ով ես»:
