Այսօր Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանում նշանակված էր «Վանաձոր» ՔԿՀ-ում բժշկի կողմից իր մասնագիտական պարտականությունները ոչ պատշաճ կատարելու հետևանքով մահացած Սլավիկ Ոսկանյանի իրավահաջորդի ներկայացուցիչներ Է. Մարուքյանի և Կ. Թումանյանի կողմից բերված բողոքի քննությունը:
Սլավիկ Ոսկանյանի իրավահաջորդի ներկայացուցիչ Էդմոն Մարուքյանը «Առաջին լրատվական»-ի հետ զրույցում նշեց, որ նիստի փոխարեն խայտառակ մի բան է տեղի ունեցել: Պարզվում է դատարանը կամ մոռացել էր, որ այդ ժամին նույն այդ դահլիճում Սլավիկ Ոսկանյանի գործով նիստ ունի, կամ էլ հատուկ արհամարհական վերաբերմունք է դրսևորել:
Երբ փաստաբանը մտել է գործով նշանակված նիստերի դահլիճ, նույն ժամին դատավոր Ռուբեն Ներսիսյանը Սլավիկ Ոսկանյանի գործով բողոքի քննությունը սկսելու փոխարեն մեկ այլ դատական նիստ անցկացնելուց է եղել: Փաստաբանը սպասել է 45 րոպե մինչև այդ նիստի ավարտը, 20 րոպե էլ դրանից հետո, սակայն այդպես էլ որևէ պարզաբանում չի ստացել:
Այնուհետև Ռուբեն Ներսիսյանը դուրս գալով դահլիճից փաստաբանին հայտնել է, որ դատարանում նիստերի ժամերն ավարտված են: Մարուքյանը հայտնել է նրան, որ Վանաձորից եկել հասել է Երևան և առանց զգուշացնելու նման բաներ չի կարելի անել, սակայն դատավորից էլ որևէ պարզաբանում չի ստացել: Փաստորեն այս գործով դատական նիստն անգամ չի բացվել, որպեսզի հետաձգվի, իսկ Մարուքյանը մեզ հետ զրույցում նշեց, որ դիմելու է ՀՀ Արդարադատության խորհուրդ և թույլ չի տալու, որ դատարանը բացահայտ արհամարհանք ցուցաբերի ու անպատիժ մնա:
Հիշեցնենք, որ Սլավիկ Ոսկանյանի իրավահաջորդի ներկայացուցիչները պահանջում են վերացնել ՀՀ հատուկ քննչական ծառայության ՀԿԳ ավագ քննիչի կողմից քրեական գործի վարույթը կարճելու և քրեական հետապնդում չիրականացնելու մասին որոշումը: Գործի էությունը կայանում է նրանում, որ 2010թ. դեկտեմբերի 30-ին ՀՀ ոստիկանության Լոռու մարզի քննչական բաժնում հարուցվել է քրեական գործ այն առիթով, որ «Վանաձոր» ՔԿՀ-ի կալանավոր Սլավիկ Ոսկանյանը 2010 թ. հոկտեմբերի 18-ին դիմել է նույն ՔԿՀ-ի բուժական մաս և «Վանաձոր» ՔԿՀ-ի բժիշկ Մարզպետ Մինասյանի կողմից ստացել համապատասխան բուժում, սակայն 2010 թ. հոկտեմբերի 24-ին մահացել է:
Սլավիկ Ոսկանյանի գործը հանդիսանում է Հելսինկյան քաղաքացիական ասամբլեայի Վանաձորի գրասենյակի կողմից նախաձեռնված ռազմավարական դատավարություններից մեկը և գրասենյակից հիշեցնում են, որ Human Rights Watche-ն իր 2011 թ. զեկույցի «Մահացության դեպքեր կալանավայրերում» բաժնում անդրադարձել է նաև Սլավիկ Ոսկանյանի գործին:
