Կոալիցիոն հուշագիրը հակասահմանադրական փաստաթուղթ է, որը, սակայն, շարունակում է գործել:
Այսօր կայացած մամուլի ասուլիսի ժամանակ այս մասին ասաց «Ժառանգություն» կուսակցության ղեկավար Րաֆֆի Հովհաննիսյանը:
Անդրադառնալով հրազդանյան ընտրությունների թեմային` նա նաև տեղեկացրեց, որ փետրվարի 12-ին Հրազդանում կայանալիք քաղաքապետի ընտրություններին իրենց կուսակցությունը սատարելու է և հնարավոր ամեն բան անելու է ՀԱԿ ներկայացուցիչ Սասուն Միքայելյանի հաղթանակի համար:
Նա անդրադարձավ նաև ֆրանսիական Սենատի` Ցեղասպանության ժխտումը քրեականացնող օրինագծին և նկատեց, որ «Ժառանգություն»-ը հարգում է ֆրանսիացի ժողովրդի կամքն ու Ցեղասպանության մասին օրենքը:
«Մենք կհարգենք ու կողջունենք բոլոր այն ազգերի ներկայացուցիչներին, անգամ թուրք մտավորականներին, ովքեր քայլեր կձեռնարկեն Ցեղասպանության ճանաչման գործում: Եթե երբևէ հայերի ու թուրքերի միջև լինի հաշտեցում, դա լինելու է ճշմարտության և արդարության, զղջման, իրավունքների վերականգնման հիման վրա»,-ամփոփեց «Ժառանգության» առաջնորդը:
