Հայաստանի Ազգային անվտանգության ռազմավարությունում հատուկ ուշադրություն է դարձվում մտավոր սեփականության արդյունավետ պաշտպանության խնդրին:
«Մեդիամաքս» գործակալության հետ զրույցում այս ոլորտում առկա խնդիրների և մարտահրավերների մասին իրենց տեսակետն են հայտնել Հայաստանում ԵՄ պատվիրակության քաղաքական, տնտեսական և տեղեկատվական բաժնի ղեկավար Օննո Սիմոնսը և ԵՄ-ի փորձագետների խմբի` ՀՀ էկոնոմիկայի նախարարության մտավոր սեփականության հարցերով խորհրդական Ալֆոնսո Կալես-Սանչեսը։
Օննո Սիմոնսի խոսքով՝ մտավոր սեփականության պաշտպանության խնդիրն առաջնայինն է ԵՄ-ի հետ Խորը և համապարփակ ազատ տնտեսական գոտու (DCFTA) ստեղծման շուրջ բանակցություններ սկսելու գործում:
«Այս առումով, մտավոր սեփականության ոլորտում իրականացվող բարեփոխումները առանձնահատուկ կարևոր են ԵՄ-ի համար: Ցավոք, չնայած որոշակի առաջընթացին օրենսդրական և վերահսկողական մարմինների մակարդակի վրա, գլխավոր մարտահրավեր է մնում օրենքի թույլ գործադրումը», – նշել է ՀՀ-ում ԵՄ-ի պատվիրակության ներկայացուցիչը:
Օննո Սիմոնսն ընդգծել է, որ բարձր մակարդակի վրա է կեղծված ապրանքների սպառումը և «պիրատությունը»: «Երբ դուք ձեռք եք բերում որոշակի ապրանք, ապա չեք կարող ասել, արդյո՞ք այն կգործի ձեր համակարգչի վրա, թե՞ ոչ: Պետք է վերջ դնել նման պրակտիկային, և այդ պատճառով էլ մենք դատախազների, ոստիկանների և մաքսավորների իրազեկությունը բարձրացնելու կարիք ունենք»,- ասել է նա։
Ալֆոնսո Կալես-Սանչեսը ևս գործակալության հետ զրույցում ասել է, որ անհրաժեշտ է կատարելագործել որոշակի հոդվածներ ՀՀ Քրեական և Քաղաքացիական օրենսգրքերում: Նա նշել է նաև, որ պետք է ոչ թե տեսականորեն, այլ գործնականում նպաստել Հայաստանի դատավորների, դատախազների և ոստիկանների գիտելիքների ավելացմանը մտավոր սեփականության պաշտպանության բնագավառում:
«Մտավոր սեփականության պաշտպանության ոլորտում կարևոր է մաքսային ծառայությունների դերը: Կեղծված ապրանքների մեծ մասն արտադրվում է ոչ միայն Հայաստանում, այլ ներմուծվում արտերկրից, օրինակ` Չինաստանից և Թուրքիայից, այդ պատճառով էլ չափազանց կարևոր է մաքսային ծառայությունների դերը կեղծված ապրանքների հոսքը կանգնեցնելու գործում: Խոսքը միայն կեղծված ջինսերի, «պիրատական» DVD-ների, այլև կեղծված դեղորայքների, սննդի և մանկական խաղալիքների մասին է, որոնք վտանգավոր են սպառողի կյանքի և առողջության համար: Եթե Հայաստանի իշխանություններն այսօր չկարողանան զսպել «պիրատային» ապրանքների հոսքը, ապագայում այն կաճի»,- ասել է նա։
Եվրոպացի փորձագետի կարծիքով՝ կեղծված ապրանքները Հայաստանում հատուկ դեպք են: Կալեսը նշել է, որ Հայաստանի կառավարությունը պետք է ավելի շատ աշխատանք ծավալի այս ոլորտում, նախ ևառաջ` իրավակիրարկման բարձրացման առումով: Բացի այդ, արդյունավետ իրավակիրարկման արդյունք կլինի տեղական արտադրանքի համար նախատեսված լավ շուկաների քանակը:
«Գնելով կեղծված ապրանքներ` սպառողները նպաստում են կեղծված ապրանքների արտադրությանը և անտեսում տեղական արտադրությունը: Հայաստանը, բնականաբար, ունի նաև սեփական մտավոր սեփականության պաշտպանության կարիք», – ասել է Կալեսը:
