Աջափնյակ և Դավթաշեն վարչական շրջանների ընդհանուր իրավասության դատարանում`դատավոր Վազգեն Ռշտունու նախագահությամբ, փետրվարի 15-ին տեղի կունենա դատական նիստ լայն հնչեղություն ստացած «Նորաշեն 2007»-ի գործով: «Առաջին լրատվական»-ի հետ զրույցում նման տեղեկություն փոխանցեց «Նորաշեն 2007»-ի գործով տուժած քաղաքացիներից մեկը:
Այս գործով առաջին դատական նիստը կայացել է փետրվարի 1-ին: «Նախ որոշվեց դատաքննության հերթականություն, այնուհետև 6 մեղադրյալներից մեկը, որը փաստաբան չուներ, խնդրեց իրեն փաստաբան տրամադրել»,- պատմեց բնակիչը: Ըստ նրա՝ նիստին ներկա էին բազմաթիվ տուժողներ`մոտավորապես 200 մարդ:
Հիշեցնենք, որ այս գործի շուրջ աղմուկ բարձրացավ այն բանից հետո, երբ պարզվեց, որ յոթանասունից ավելի ընտանիքներ «Նորաշեն-2007» սպառողական կոոպերատիվին գումար են վճարել նորակառույցում բնակարան ունենալու նպատակով, բայց հետագայում պարզել են, որ իրենց խոստացված բնակարանները այլ մարդկանց են վաճառվել:
Գործով որպես տուժող և վկա անցնում են շուրջ երեք հարյուր անձինք: Գործի հետ կապված շրջանառվում են մի շարք բարձրաստիճան անձանց անուններ, որոնք էլ, ըստ բնակիչների, մեղավոր են իրենց հետ տեղի ունեցածի համար: Համապատասխան քրեական գործը քննեց Հատուկ քննչական ծառայությունը: Իսկ անցած տարվա վերջին ազդարարվեց այս գործով նախաքննության ավարտի և քրեական գործը դատարան ուղարկելու մասին: Արդյունքում, ամբաստանյալի աթոռին նստած են վեց հոգի, բայց միևնույն է՝ տուժած բնակիչների կողմից մատնանշված պաշտոնյաներից և ոչ մեկը պատասխանատվության չի ենթարկվի:
ՀՀ ՀՔԾ-ի կողմից գործի վերաբերյալ նախկինում տարածված հաղորդագրության մեջ ասվում էր, որ մինչդատական վարույթում ձեռք բերված ապացույցների հիման վրա կոոպերատիվի նախագահ Ա. Թադևոսյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով և 205-րդ հոդվածի 2-րդ մասով, Լ. Սամվելյանին՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով, Ա. Մարտիրոսյանին՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով և 213-րդ հոդվածի 2-րդ մասի 1-ին և 2-րդ կետերով, Ց. Պետրոսյանին՝ ՀՀ քրեական օրենսգրքի 38-178-րդ հոդվածի 3-րդ մասի 1-ին կետով, իսկ Վ. Օհանյանին և Դ. Երեմյանին՝ ՀՀ քրեական օրենսգրքի 213-րդ հոդվածի 2-րդ մասի 1-ին և 2-րդ կետերով:
