Apple ընկերությունը թողարկելու է iPod nano նվագարկչի նոր տարբերակ, որն ունենալու է տեսախցիկ: Այս մասին հայտնում է AppleInsider կայքը, որը տեղադրել է անանուն աղբյուրներից ստացած սարքի նկարը:
iPod nano-ի վերջին, վեցերորդ սերունդը ցուցադրվել էր 2010 թվականի սեպտեմբերին: Նախորդ սարքերի համեմատ` սարքը բավականին փոփոխություններ է կրել. այն դարձել է քառակուսի և զրկվել կլոր պտուտակից, որը փոխարինվել է սենսորային էկրանով:
Համաձայն հրապարակված նկարների՝ թարմացված iPod nano-ի դիզայնը նույնն է մնացել, միայն մեկ տարբերությամբ. հետևի մասում մի կողմում տեղադրվելու է տեսախցիկը, իսկ մյուս կողմում լինելու է կլոր անցքը` նախատեսված հագուստին ամրանալու համար:
iPod նվագարկիչները վաճառվում էին միլիոններով, սակայն iPhone սմարթֆոնների թողարկումից հետո դրանց պահանջարկը զգալիորեն նվազեց:
