«Հրապարակ»-ը զրուցել է «Օրինաց երկիր» կուսակցության նախագահ Արթուր Բաղդասարյանի հետ:
-Դուք հույս ունեք, որ 2012-ի խորհրդարանում ունենալու եք ավելի շատ ներկայացվածություն, քան հիմա՞:
-Վստահ եմ, իհարկե: Եվ դա հիմքեր ունի: Մենք թիմ ունենք, մենք ժողովրդի հետ ազնիվ ենք: Ոչ մեկը չի կարող ասել, որ Արթուր Բաղդասարյանը արյուն կամ կողոպուտ է բերել էս երկրին: Ընդհակառակը՝ մենք 2008-ին կանխել ենք արյունը և մեր երկրում բազմաթիվ բարեփոխումների նախաձեռնող ենք եղել: ՕԵԿ-ը շուրջ 200 օրենքի հեղինակ է, և այսօր բոլոր հիմքերը ունենք արդյունքներ արձանագրելու:
-Վերջին շրջանում Դուք շատ շրջագայեցիք, ինչը խոսակցությունների, վերլուծությունների տեղիք տվեց: Մասնավորապես Ռուսաստանում Ձեր հանդիպումների մասին ասում էին, որ Դուք այնտեղ քաղաքական համաձայնություն եք ձեռք բերել առաջիկայում Աժ նախագահի պաշտոնի հետ կապված:
-Նախ, բոլոր համաձայնությունները ձեռք են բերվում մեր երկրում, և երկրորդ՝ ամենայն ազնվությամբ ասեմ, որ ես չեմ ուզում դառնալ Աժ նախագահ: Ընդհանրապես չեմ ուզում դառնալ պատգամավոր: Ես արդեն հոգնել եմ, քանի որ եղել եմ Աժ բոլոր գումարումների պատգամավոր:
-Բայց ցուցակը Դո՞ւք եք գլխավորելու:
-Այո, ես եմ գլխավորելու, բայց սա իմ վերջնական որոշումն է: Ես իմ աշխատանքից գոհ եմ և ինձ շատ լավ եմ զգում իմ աշխատանքում: Իմ աշխատանքը կախված է մեկ մարդուց՝ երկրի նախագահից, և մենք շատ լավ հարաբերություններ ունենք: Ինչ վերաբերում է Ռուսաստանին, ապա ասեմ, որ ես այնտեղ ունեմ շատ լավ բարեկամներ, որոնց հետ համագործակցում ենք: Այդ թվում իմ ռուսաստանյան կոլեգաներ Պատրուշևը, Բորդյուժան և այլք: Դրա մեջ վատ բան չկա:
-Ասում են, որ Դուք հիմա Սերժ Սարգսյանի ամենավստահելի մարդկանցից եք, ում հետ խորհրդակցում է:
-Իհարկե, ես ամենօրյա կապի մեջ եմ նախագահի հետ աշխատանքի բերումով: Ասեմ նաև, որ Սերժ Սարգսյանը, որպես մարդ, շատ լավ ընկեր է:
-Իսկ իր կողմից Ձեր հանդեպ ունեցած վերաբերմունքը ինչո՞վ կարելի է բացատրել: Գուցե իրավահաջո՞րդ է տեսնում Ձեր մեջ:
-Դրա մասին խոսելը հիմարություն է: Իր վերաբերմունքն էլ պայմանավորված է երևի իմ աշխատանքով, իմ շիտակությամբ, իմ նվիրվածությամբ, սկզբունքայնությամբ:
