Ինչպես հայտնի է, 2003-ի նախագահական ընտրություններից հետո, երբ պարզվեց, որ իշխանական թեկնածուն Ռոբերտ Քոչարյանն արտերկրում քվարկությունների արդյունքներով պարտվել էր, ՀՀ իշխանությունները որոշեցին ՀՀ Ընտրական օրենսգրքում փոփոխություն կատարել: Արդյունքում արտերկրում գտնվող ՀՀ քաղաքացիները քվեարկելու իրավունքից զրկվեցին: Այս փոփոխությունն արվեց 2007-ի փետրվարի 26-ին` նույն թվականի մայիսի 12-ին նշանակված ԱԺ ընտրություններից երեք ամիս առաջ:
Իսկ այսօր երբ ընդդիմությունն է առաջարկում ԸՕ փոխել, ԱԺ-ի իշխանական մեծամասնությունը հայտարարում է, թե կտրականապես դեմ է ընտրություններից երկու-երեք ամիս առաջ ՀՀ Ընտրական օրենսգրքում փոփոխություններ կատարելուն:
Այս մոտեցման մասին «Առաջին լրատվական»-ի հետ զրույցում հիշեցրեց նաև ԱԺ ԲՀԿ խմբակցության պատգամավոր Նաիրա Զոհրաբյանը, երբ նրանից հետաքրքրվեցինք, թե ինչպես է ինքը վերաբերվում արտերկրում գտնվող ՀՀ քաղաքացիների՝ ընտրելու իրավունքից զրկված լինելու խնդրին:
Արտերկրում բնակվող ՀՀ քաղաքացիների խնդիրն, ըստ Ն. Զոհրաբյանի, իսկապես կարևոր է և արժանի, որ քաղաքական ուժերն առաջիկա քննարկումներում դրան ուշադրություն դարձնեն:
«Սակայն խորհրդարանի մեծամասնությունը դեմ է ԸՕ-ն ընտրություններից երկու-երեք ամիս առաջ փոխելուն: Նույն տեսակետն ունեն մեր բարձրացրած հարցի` համամասնական- մեծամասնական խնդրի վերաբերյալ: Նույն պատճառաբանությունն է բերվում` որ ընտրություններին շատ քիչ ժամանակ է մնացել»,- ասաց Զոհրաբյանը:
Զոհրաբյանը չբացառեց, որ ԸՕ փոփոխությունների վերաբերյալ լսումների ժամանակ արտերկրում գտնվող ՀՀ քաղաքացիների խնդիրը ևս կարող է քննարկվել:
«Հնարավոր է` այդ լսումներին խնդիրը նորից բարձրացվի, բայց որքանով է հավանական, որ մինչ ընտրություններն Ընտրական օրենսգիրքը փոխվի՝ դժվարանում եմ ասել»,- ասաց նա:
