Բժիշկներին զգուշացրել են, որ չի կարելի հիվանդներին հեռախոսով հայտնել, որ նրանց մոտ ախտորոշվել է քաղցկեղ:
Սա տեղի է ունեցել այն բանից հետո, երբ Բրիտանիայի «Բըրթոն» հիվանդանոցների ազգային առողջապահական կենտրոն բողոք է ներկայացվել, քանի որ հիվանդներից մեկին այդ լուրը բժիշկը հայտնել է հեռախոսազրույցի ժամանակ:
Daily Mail-ը գրում է, որ այժմ հիվանդանոցների տնօրեններն ընդհանուր զգուշացում են ներկայացրել անձնակազմներին` ասելով, որ նման լուրն այդ կերպ հայտնելը «անհարմար է»:
Ինչպես ասել է «Բըրթոն» հիվանդանոցի տնօրենը, ինքը զարմանում է, որ ստիպված է նման զգուշացում անել: Մեծ Բրիտանիայի քաղցկեղի հետազոտության կենտրոնի բուժքույրն ասել է, որ, անշուշտ, դժվար է լսել, երբ հայտնում են, որ քեզ մոտ քաղցկեղ է ախտորոշվել, այդ իսկ պատճառով հարկավոր է այդ լուրը զգուշությամբ հաղորդել: Հեռախոսազրույցի միջոցով այդ լուրը հայտնելով` բժիշկը չի կարող վստահ լինել, թե ինչպես կարձագանքի հիվանդը, կամ արդյո՞ք նրա կողքին կլինեն հարազատ մարդիկ` նրան օգնելու համար։
