ՄԱԿ-ի գլխավոր քարտուղար Պան Գի Մունը հույս է հայտնել, որ Սիրիայի բանաձևի նոր փաթեթը, որը ներառում է երկրի նախագահին ուղղված հրաժարականի կոչ, կարտահայտի ԱԽ անդամների միաձայն դիրքորոշումը: «Ես անկեղծորեն հույս ունեմ, որ ԱԽ անդամները կցուցաբերեն միաձայնություն և կկարողանան քննարկման ժամանակ հստակ արտահայտել միջազգային հանրության կարծիքը»,- հայտարարել է Պան Գի Մունը Հորդանան կատարած այցի ժամանակ:
Արաբական պետությունների լիգան՝ ԱՄՆ-ի, Մեծ Բրիտանիայի և Ֆրանսիայի աջակցությամբ այսօր ՄԱԿ-ի ԱԽ նիստին կներկայացնի Սիրիայի դեմ բանաձևի նախագիծ: Վերջինիս դեմ է արտահայտվում Ռուսաստանը, որի կարծիքով՝ բանաձևը նախադրյալներ է ստեղծում Սիրիա ներխուժման համար: Իր հերթին Չինաստանը կարծում է, որ չեն պատրաստվում պաշտպանել բանաձևը՝ առանց դրանում փոփոխություններ մտցնելու:
«Անգամ ԱՊԼ դիտորդների՝ Սիրիայում աշխատելու ժամանակ երկրում շարունակվում էր բռնությունը. սպանվել է մի քանի հարյուր մարդ, ամեն օր զոհվում են տասնյակ մարդիկ: Բռնությանը պետք է անհապաղ վերջ տալ»,- նշել է ՄԱԿ-ի գլխավոր քարտուղարը՝ ավելացնելով, որ ԱԽ համար սկզբունքային կարևոր նշանակություն ունի անհրաժեշտ քայլեր ձեռնարկել:
Սիրիայում տիրող իրավիճակը ՄԱԿ-ի ԱԽ նիստում ևս մեկ անգամ քննարկվել է 2011 թ. հոկտեմբերի 4-ին, սակայն Սիրիայի դեմ բանաձևն արգելափակվեց Ռուսաստանի և Չինաստանի կողմից:
