«ԱՄՆ-ն երբեք չի ցանկացել ու չի պատերազմի Իրանի հետ, իսկ այն ամենը, ինչ այսօր կատարվում է այնտեղ, ուղղակի միջոց է, որ Իրանը դուրս գա մի շարք հարցերից ու ծրագրերից»,- այս մասին այսօր լրագրողների հետ հանդիպմանը նշեց քաղաքագետ Իգոր Մուրադյանը:
Ըստ նրա՝ Մերձավոր Արևելքը այն տարածքն է, որտեղ որոշվելու է Իրանի ճակատագիրը: «Մերձավոր Արևելքի արաբները արդեն ԱՄՆ-ի դաշնակիցներն են, իսկ ԱՄՆ-ն իր հերթին ցույց է տվել արաբներին, որ Իսրայելն այն երկիրը չէ, որը կարող է իրենց համար վտանգավոր լինել: Իրանի շրջափակումը կատարվում է` ելնելով արաբական երկրների շահերից»,- ասաց Իգոր Մուրադյանը:
Խոսելով Թուրքիայի և Ադրբեջանի մասին՝ քաղաքագետը նշեց, որ այս երկու պետությունները չեն մասնակցելու Իրանի շրջափակմանը: «Թուրքական արտադրանքների սպառումը մեծ մասամբ կատարվում է Իրանի օգնությամբ, իսկ Ադրբեջանը փորձում է զգուշանալ Իրանից: Պատճառն այն է, որ Ադրբեջանին թվում է, թե Թեհրանը ցանկանում է առաջիկայում վերադարձնել ադրբեջանական տարածքները»,- ասաց նա:
Ըստ Մուրադյանի՝ ԱՄՆ-ը Հայաստանին չի ենթարկի շրջափակման, քանզի հասկանում է, որ Հայաստանը ոչ մի կերպ չի կարող միանալ Իրանի դեմ կիրառվելիք պատժամիջոցներին: «Հայաստանի համար Իրանի նկատմամբ կիրառվելիք ցանկացած պատժամիջոց անընդունելի է: Միակ կենսունակ սահմանը մեզ համար Վրաստանն է, քանի որ ոչ ԱՄՆ-ը, ոչ Ռուսաստանը այդպես էլ չկարողացան լուծել հայ-թուրքական սահմանի խնդիրը: Շատ կարևոր է հասկանալ, թե Հայաստանը ինչպես պետք է բանակցի աշխարհի հզորների հետ»,- ասաց Մուրադյանը:
