«Ես երբեք հայտարարություն չեմ արել որևէ ալիքի կամ լրագրողի, չեմ տվել որևէ հովանավորի անուն: Եթե ինչ-որ հովանավորների անուններ են դուրս եկել, դա չի գալիս ինձնից: Ես այդպիսի հայտարարություն չեմ արել». այս մասին լրագրողների հետ հանդիպման ժամանակ հայտարարեց Հովհաննես Թումանյանի թոռնուհին` Իրմա Սաֆրազբեկյանը:
Այս հայտարարությամբ նա հերքեց մամուլում շրջանառվող լուրերը, թե Հովհաննես Թումանյանի թբիլիսյան տունը փորձում է գնել ԲՀԿ առաջնորդ Գագիկ Ծառուկյանը: Ի դեպ, այսօր վերջինիս մամլո խոսնակ Խաչիկ Գալստյանը ևս հերքեց այդ լուրերը:
«Այսօր ես շատ ուրախ եմ, որ այլևս այդ գործով չի զբաղվելու մեր ընտանիքը, և այդ ծանր բեռը մեր վրա չի լինելու: Կա Լևոն Անանյանը, կա «Լոռվա ձոր» հայրենակցական միությունը, Հրատարակիչների միության նախագահ Մկրտիչ Կարապետյանը»,- հայտարարեց Ի. Սաֆրազբեկյանը: Վերջինիս խոսքերով Թումանյանն իր ողջ կյանքում զբաղվել է բարեգործությամբ, և հիմա եկել է ժամանակը, որ «բարեգործություն լինի Թումանյանի հանդեպ»:
Հիշեցնենք, որ 10 օր առաջ ՀՀ վարչապետի հանձնարարությամբ ստեղծված փոքրաթիվ մի պատվիրակություն էր մեկնել Թբիլիսի` ճշտելու այնտեղից հնչեցրած ահազանգի փաստերը, թե Դավիթաշվիլի 18 հասեցում գտնվող Թումանյանի բնակարանը վաճառվում է: Հնչեցվել էր նաև վրաց-թուրքական ընկերության անուն: Այս մասին լրագրողների հետ հանդիպմանը ասաց Հայաստանի գրողների միության նախագահ Լևոն Անանյանը
Հայկական պատվիրակությունը հանդիպել էր Թբիլիսիում բանաստեղծի տանտիրոջ` Արչիլ Լեժավայի հետ, Թումանյանի ծոռնուհի Ալյոնա Կոլեսնիկովայի, Վրաստանում ՀՀ արտակարգ ու լիազոր դեսպանի, Վիրահայոց թեմի առաջնորդին և այլ պաշտոնատար անձանց:
Վերադարձից հետո իրենց ունեցած ամբողջ տեղեկատվությունը ներկայացրել են ՀՀ վարչապետ Տիգրան Սարգսյանին, Թումանյանի թոռնուհուն` Իրմա Սաֆրազբեկյանին և ՀՀ մշակույթի նախարարին:
Քննարկումների ընթացում արծարծվել է մի քանի տարբերակ, թե ի՞նչ կարող է անել կառավարությունը՝ բացել հիմնադրամ կամ հայտարարել դրամահավաք: Լ. Անանյանի խոսքով` իրենց տրված ժամանակը շատ քիչ էր, քանի որ Լեժավան իրենց տվել է մեկ ամիս ժամանակ: Վերջինս հայկական կողմից պահանջել է համարժեք բնակարան նույն թաղամասում, նույն փողոցում:
