ԱՄՆ նախագահ Բարաք Օբամայի վարչակազմը պնդում է, որ ՄԱԿ-ի Անվտանգության խորհուրդը պետք է միջամտի Սիրիայում հետզհետե թափ առնող բռնություններին՝ այս երկրի նախագահ Բաշար Ալ-Ասադին հղելով ուղերձ և նշելով, որ իր կողմից ընդդիմության նկատմամբ արդեն տասը ամիս իրականացվող բռնությունները վտանգ են ներկայացնում միջազգային խաղաղությանն ու անվտանգությանը:
«Ամերիկայի ձայն»-ի փոխանցմամբ՝ ԱՄՆ արտգործնախարար Հիլարի Քլինթոնը երկուշաբթի օրն արված հայտարարությունում նշել է, որ Վաշինգտոնը դատապարտում է Սիրիայի կառավարության կողմից վերջին մի քանի օրվա ընթացքում քաղաքացիական անձանց դեմ իրականացված հարձակումները, որոնք հարյուրավոր զոհերի պատճառ են դարձել:
Քլինթոնն ասել է, թե մասնակցելու է ՄԱԿ-ի Անվտանգության խորհրդի՝ երեքշաբթի օրը կայանալիք հանդիպմանը, որի ընթացքում միջազգային այս մարմնին կոչ է անելու օժանդակություն ցուցաբերել Արաբական պետությունների լիգայի կողմից Ասադի հրաժարականի վերաբերյալ ներկայացված ծրագրին՝ որպես երկրում բռնությունների իրականացումը դադարեցնելու միջոց:
Այս ընթացքում Սիրիայի ընդդիմության ակտիվիստները հայտնել են, որ կառավարական ստորաբաժանումները ծանր մարտերի արդյունքում երկուշաբթի օրը վերականգնել են հսկողությունը Դամասկոսի մի քանի արվարձանների նկատմամբ:
Ակտիվիստների խոսքերով՝ Սիրիայի կառավարական ուժերը նախ դուրս են մղել «Սիրիայի ազատ բանակի» ուժերը երկրի մայրաքաղաքի կենտրոնին հարող թաղամասերից, ապա մուտք են գործել արվարձաններ, որտեղ սկսվել են փողոցային մարտեր:
Սիրիայում բախումներ են տեղի ունեցել նաև երկրի կենտրոնական՝ Հոմս նահանգում:
Ընդհանուր առմամբ Սիրիայում, ըստ ակտիվիստների, երկուշաբթի օրն իրականացված բռնությունների զոհ է դարձել առնվազն 28 մարդ, որոնց հիմնական մասը քաղաքացիական անձինք են:
