Հրազդանում փետրվարին 12-ին կայանալիք քաղաքապետի ընտրություններին ընդառաջ՝ քաղաքապետի թեկնածու, ՀԱԿ անդամ Սասուն Միքայելյանի համակիրներից մի քանիսին ազատել են աշխատանքից: Այս մասին «Առաջին լրատվական»-ի հետ զրույցում ասաց Սասուն Միքայելյանը:
Նա նաև տեղեկացրեց, որ Հրազդանի թիվ 4 միջնակարգ դպրոցի ուսուցչանոցի դռները փակել են, որ ուսուցիչները չկարողանան մասնակցել Սասուն Միքայելյանի նախընտրական հանդիպմանը:
«Ժողովուրդը գալիք ընտրություններին շատ լավ է տրամադրված, բայց նաև վախի մթնոլորտ կա: Որպեսզի չստարեն ինձ, մարդկանց ահաբեկում և ազատում են աշխատանքից: Այսօր էլ մի երիտասարդ աղջիկ էր եկել՝ 2 երեխաների մայր: Նրան էլ էին գործից ազատել»,- պատմեց Սասուն Միքայելյանը:
Ըստ նրա՝ նախընտրական քարոզարշավի շրջանակներում հրազդանցիների հետ բակերում կազմակերպվող հանդիպումների ժամանակ, որպես կանոն, 500-600 մարդ է հավաքվում: Սասուն Միքայելյանի խոսքով, իր հետ հանդիպումների ժամանակ ընտրողները դժգոհում են Հրազդանի քաղաքապետից:
«Ես գիտեմ, ընտրվելու եմ: Ես միշտ հաղթել եմ՝ թե պատերազմի դաշտում, թե ընտրությունների ժամանակ: Ժողովուրդը գիտակցում է՝ ինչ է կատարվում: Մարդիկ կորցնելու բան չունեն, իրենց տներում սոված նստած են: Նրանք հավատում են, որ ես կգամ, ինչ-որ բան կփոխեմ: Ժողովրդի ուժն է հաղթելու: Այսօր եկել է գնահատականներ տալու ժամանակը, քարերը հավաքելու ժամանակը: Հերիք է ժողովրդի վրա այսքան բռնանան, այսքան բռիություն անեն: Ես 20 տարուց ավել կյանք եմ տվել էս երկրի համար: Պայքարել եմ, որ նման հայվանները գա՞ն, ժողովրդին ստիպեն, ճնշեն, որ ինձ չընտրի»,- ասաց Սասուն Միքայելյանը:
Նշենք, որ Հրազդանի քաղաքապետի ընտրությունները նշանակված են փետրվարի 12-ին: Հրազդանի քաղաքապետի թեկնածու է առաջադրվել նաև Հրազդանի գործող քաղաքապետ, ՀՀԿ անդամ Արամ Դանիելյանը:
