ՀՀ ԶՈՒ կազմավորման 20-րդ տարեդարձին նվիրված տոնական միջոցառումներ են տեղի ունեցել նաև Հունաստանում։
Հունվարի 26-ին Հունաստանի Զինված Ուժերի «Սպայի տան» հանդիսասրահում տեղի է ունեցել ՀՀ ԶՈՒ կազմավորման 20-րդ տարեդարձին նվիրված տոնական ընդունելություն, որին ներկա եհն եղել Հունաստանի Ազգային պաշտպանության գլխավոր շտաբի պատվավոր պետ, գեներալ Գեորգիոս Անտոնակոպուլոսը, Հունաստանի ազգային հերոս Մանոլիս Ղլեզոսը, Ազգային պաշտպանության նախարարության ներկայացուցիչներ, ինչպես նաև հունահայ ազգային-քաղաքական և հասարակական-մշակութային կառույցների, ԶԼՄ-ների ներկայացուցիչներ:
«Առաջին լրատվական»-ը ՀՀ ԱԳՆ մամլո գրասենյակից տեղեկանում է, որ պաշտոնական հյուրերին զինվորական պատիվներով ողջունել են Հունաստանի ցամաքային զորքերի «Էվելպիդոն» ռազմական ակադեմիայի կուրսանտները, ՀՄԸՄ և «Արարատ» մշակութային-մարզական միության խմբերը:
Միջոցառմանը հնչել են երկու պետությունների ազգային հիմները, ապա կատարվել է հունահայ համայնքի կղերից դասի օրհնության արարողություն:
ՀՀ ԶՈՒ կազմավորման, հայ-հունական պատմական դարավոր զինակցության և ներկա երկկողմ ռազմական համագործակցության վերաբերյալ ամփոփ ելույթով հանդես է եկել ՀՀ ռազմական կցորդը:
Շեշտվել է, որ հայ-հունական ռազմական համագործակցությունը մշտապես կայուն զարգացում է դրսևորում:
Ազգային ռազմական պարերով ելույթ է ունեցել Համազգային միության պարախումբը: Միջոցառումն ուղեկցվել է ազգային և ռազմական երգերով, ՀՀ ԶՈՒ կուրսանտների ավանդական քոչարիով:
Բացի Հունաստանից՝ հունվարի 29-ին տոնական միջոցառումներ են տեղի ունեցել Իրանում։
Թեհրանի «Արարատ» մարզամշակութային համալիրի հանդիսությունների սրահում ԻԻՀ-ում Հայաստանի Հանրապետության դեսպանությունը կազմակերպել էր պաշտոնական ընդունելություն` նվիրված Հայաստանի ազգային բանակի կազմավորման 20-րդ տարեդարձին:
Հանդիսությանը ներկա բազմաթիվ հյուրերի թվում են եղել ԻԻՀ պետական, ռազմական, քաղաքական և հասարակական գործիչներ, ԻԻՀ մեջլիսի հայազգի պատգամավորներ, Թեհրանում հավատարմագրված դիվանագիտական կորպուսի և միջազգային կազմակերպությունների անդամներ, ռազմական կցորդներ, արվեստի, գիտության և տնտեսության ոլորտների ներկայացուցիչներ, ինչպես նաև իրանահայ համայնքի երեք թեմերի անդամներ, լրագրողներ:
Հանդիսության պաշտոնական մասն սկսվել է ՀՀ և ԻԻՀ պետական օրհներգների կատարումով, որից հետո ներկաներին շնորհավորական ուղերձով դիմել է ԻԻՀ-ում ՀՀ դեսպան Գրիգոր Առաքելյանը:
Հայոց բանակի 20-ամյա ուղու մասին համառոտ զեկույց է ներկայացրել ԻԻՀ–ում ՀՀ դեսպանության ռազմական կցորդը:
Երեկոն ուղեկցվել է Հայաստանի ազգային բանակի 20 ամյակին նվիրված տեսաֆիլմերի ցուցադրությամբ և հայկական ռազմահայրենասիրական երգերի կատարմամբ: