Բրիտանական խորհրդի առանցքային գործունեությունը անգլերեն լեզվի ուսուցումն ու դրա տարածումն է: Բրիտանական խորհրդի 10-ամյակի առթիվ այսօր կազմակերպված մամուլի ասուլիսի ժամանակ այս մասին ասաց Հայաստանում Մեծ Բրիտանիայի դեսպան Քեթրին Լիչը:
«Կառույցը արվեստի մեծ ջատագով է: Բացի այդ, Բրիտանական խորհուրդը գործունեություն է ծավալում գենդերային հավասարության, հաշմանդամների հիմնախնդիրների ոլորտներում»,- նկատեց նա` հույս հայտնելով, որ Հայաստանում Բրիտանական խորհրդի հետագա գործունեությունը առավել արդյունավետ կլինի:
Բրիտանական խորհրդի հայաստանյան գրասենյակի տնօրեն Արևիկ Սարիբեկյանն իր հերթին տեղեկացրեց, որ Բրիտանական խորհուրդը 77 տարվա պատմություն ունի:
«Այսօր Բրիտանական խորհուրդը Հայաստանում լուրջ գործունեություն է ծավալում: Մենք փորձում ենք մարդկանց միջև ստեղծել կապեր, մոտեցնել նրանց` առավելապես մշակույթի ճանապարհով:
Բացի այդ, կարևորում ենք անգլերենի իմացության մակարդակի բարձրացման հարցը: Այս տարի իրականացվելիք մեր մի ծրագրի շրջանակներում հայաստանցի անգլերենի ուսուցիչները հնարավորություն կունենան մրցակցել, կիսել իրենց փորձն աշխարհի մի շարք երկրների անգլերենի մասնագետների հետ:
Փետրվարի 10-ին տեղի կունենա նաև լրագրողական «Նանե» մրցանակաբաշխությունը»,- տեղեկացրեց նա` հավելելով, որ Բրիտանական խորհուրդը համագործակցում է միջազգային մի շարք կառույցների հետ:
