APA-ի հաղորդմամբ, Միավորված ազգերի կազմակերպությունում Ադրբեջանի գործերի ժամանակավոր հավատարմատար Թոֆիկ Մուսաևը նամակով դիմել է ՄԱԿ-ի գլխավոր քարտուղար Պան Գի Մունին և ՄԱԿ-ի Գլխավոր ասամբլեայի անդամներին` Հայաստանի Հանրապետությանը մեղադրելով «օկուպացիոն քաղաքականություն իրականացնելու մեջ»: Թ.Մուսաևի ուղերձում, մասնավորապես, նշված է. «Անցած ամիս հայկական ուժերը զորավարժություններ անցկացրեցին Ադրբեջանի գրավյալ տարածքներում: Այդ զորավարժությունների ընթացքին հետևում էին Հայաստանի նախագահ Սերժ Սարգսյանն ու պաշտպանության նախարար Սեյրան Օհանյանը: Զորավարժությունների ավարտին Սերժ Սարգսյանը հանդես է եկել հայտարությամբ»։ Ադրբեջանցի դիվանագետը ծավալուն մեջբերում է բերել Ս.Սարգսյանի ելույթից: Մասնավորապես շեշտվել է Ս.Սարգսյանի ելույթի հետևյալ հատվածը. «Երբ պահը գա, մենք կկարողանանք շատ ավելի լուրջ հաջողությունների հասնել, քան 1992-94 թվականներին` վերջնականապես լուծելով այս հարցը: Երբ պահը գա, մեր հարվածը կլինի վերջնական ու կործանանար»:
Այս խոսքերը մեջբերելուց հետո Թ.Մուսաևը դիմել է Պան Գի Մունին. «Ադրբեջանական կողմի համոզմամբ, Հայաստանի կողմից իրականացված նման ագրեսիվ ու սադրիչ քայլը, ինչպես նաև բարձրաստիճան պաշտոնյաների կողմից հնչեցվող ռազմատենչ հայտարարությունները հակասում են այն միջազգային պարտավորություններին, որ ստանձնել է Հայաստանը` պատրաստակամություն հայտնելով գտնել հայ-ադրբեջանական հակամարտության լուծումը»:
ՄԱԿ-ում Ադրբեջանի ներկայացուցիչը չի սահամանփակվել այսքանով. նա նաև հիշեցրել է, որ հայկական զինված ուժերի վերջին զորավաժությունները ընթացել են Աղդամի շրջանում. «Հարկ է նշել, որ Աղդամի շրջանի օկուպացիան դատապարտվել է ՄԱԿ-ի Գլխավոր ասամբելայի թիվ 853 բանաձևով: Այդ բանաձևում նաև հստակ պահանջ կա ուղղված հայկական կողմին` անհապաղ կերպով լքել տարածքը»: Ադրբեջանցի դիվանագետի նամակում նշվում է. «Զորավարժություններն ու ռազմատենչ հայտարարությունները չեն նպաստում հարցի խաղաղ կարգավորմանը, ինչպես նաև համահունչ չեն այն ջանքերին, որ ուղղված են հարցի ավելի ակտիվ կարգավորմանը, մասնավորապես ԵԱՀԿ-ի` Աստանայում կայացած վերջին գագաթնաժողովի համատեքստում»:
Ադրբեջանցի դիվանագետը նաև փորձել է ապացուցել, որ Lեռնային Ղարաբաղում տեղակայված են ոչ թե չճանաչված հանրապետության, այլ Հայաստանի զինվորական ստորաբաժանումները:
Թոֆիկ Մուսաևը իր նամակում մատնանաշել է նոյեմբերի 19-ին ղարաբաղյան դիրքերում տեղի ունեցած միջադեպը, որի արդյունքում 4 հայ զինծառայող էր զոհվել. «Ամենակարևոր իրողությունն այն է, որ Հայաստանի պաշտպանության նախարարության քննչական ծառայությունը հետաքննում է մի միջադեպ, որ տեղի է ունեցել Հայաստանի սահմաններից դուրս` կիրառելով Հայաստանի քրեական օրենսգրքի դրույթները»: