Բանակի 20-ամյակն է, ու պետք է բանակի մասին խոսել: Բանակի վերաբերյալ մեր բոլոր պատկերացումները ներկայացնելու անհրաժեշտությունը պայմանավորված է մեկ բանով, որ մեր երկրի պաշտպանությունն ամուր է, մեր ռազմական տեխնիկան բարձր մակարդակի վրա է: Սա անհրաժեշտություն է ոչ միայն հակառակորդի կամ թշնամու ականջների, այլև ժողովրդի համար: «Առաջին լրատվական»-ի հետ զրույցում ասաց բանաստեղծ Ռազմիկ Դավոյանը:
Նրա խոսքով` ժողովուրդը դա շատ լավ պետք է գիտակցի, քանի որ առաջիկայում ընտրություններ են, իշխանություն է ձևավորվելու: «Նրանք պետք է իմանան, որ մեր երկիրն ունի այդ հզորությունը, բանակի անհրաժեշտությունը, և եթե մեր ժողովուրդն ուզում է այդ հզորությունը պահպանել, պետք է համապատասխան որոշումներ ընդունի»,- նշեց նա:
Ինչ վերաբերում է մամուլի այն հրապարակումներին, որտեղ լուսաբանվում են բանակում կատարվող դեպքերը (ինքնասպանություններ, խոշտանգումներ), ապա բանաստեղծը նշեց, որ ինքը մամուլ ընդհանրապես չի կարդում, քանի որ «դույզն-ինչ չի վստահում»:
«Այն, որ ընդդիմությունը կարող է բանակում իրականում տեղի ունեցած դեպքերը ներկայացնել իբրև ընդհանրական երևույթ, դա բացատրվում է նախընտրական, քարոզչական հանգամանքներով»,- նշեց նա` համոզմունք հայտնելով, որ այն, որ մեր բանակն ուժեղ բանակ է՝ դրա մասին երկու կարծիք լինել չի կարող:
