«Ընտրական օրենսգրքի» հերթական փոփոխությամբ, որը առաջարկել է Դավիթ Հարությունյանը, նախատեսվում է սահմանել Ընտրատարածքային ընտրական հանձնաժողովների եւ Կենտրոնական ընտրական հանձնաժողովի 7-ական անդամ, որոնց կառաջարկեն ՀՀ օմբուդսմենը, Վճռաբեկ դատարանի նախագահն ու Փաստաբանների պալատի նախագահը, իսկ կնշանակի hանրապետության նախագահը: Փաստորեն, կուսակցությունները ներկայացուցիչներ կունենան միայն տեղամասային ընտրական հանձնաժողովներում: ՀՀԿ-ական Ռաֆիկ Պետրոսյանի խոսքերով, սա կօգնի խուսափել խախտումներից. «Նախկինում կուսակցությունների ներկայացուցիչներից յուրաքանչյուրը կրակը քաշում էր իր բաղաջի տակ»:
«Ժառանգությունն» ու ՀՅԴ-ն առաջարկում են հանձնաժողովների ձեւավորման 50/50 տոկոս համամասնության կարգը, որի դեպքում պատասխանատվությունը հավասարապես կկիսեն ընդդիմությունն ու իշխանությունը: «Այլապես թող 100 տոկոս իշխանությունը պատասխանատվությունը վերցնի իր վրա ընտրությունների համար, եւ եթե վաղը, Աստված չանի, կեղծվեն ընտրությունները, միակ պատասխանատուն լինի իշխանությունը», – առաջարկեց «Ժառանգություն» կուսակցության փոխնախագահ Ռուբեն Հակոբյանը:
Հակոբյանի կարծիքով, եթե այդ կարգը ընդունվի, կարելի է ընդհանրապես ընտրություններ չանցկացնել: