Մեքսիկայի տարածքում զգալի ցրտերի պատճառով նկատվել է գրիպի A/H1N1 վիրուսային վարակվածության թվի աճ: Այս մասին հայտնում է ИТАР-ТАСС-ը` վկայակոչելով Մեքսիկայի առողջապահության նախարարության հայտարարությունը` ըստ որի երկրում գրանցվել է այս հիվանդությամբ վարակված ավելի քան 1,4 հազար հիվանդ: Նրանցից 29-ը մահացել է:
Հիվանդների թվի զգալի աճ նկատվել է այս շաբաթվա ընթացքում: Մինչև հունվարի 20-ը գրանցվել է 573 հիվանդ, որոնց մոտ ի հայտ է եկել A/H1N1 վիրուսը, իսկ մինչև շաբաթվա վերջ նրանց թիվն ավելացել է ևս 883 մարդով:
Չնայած նոր գրիպով վարակվածների թվի աճին, Մեքսիկայի իշխանություններն առայժմ լայնածավալ կանխարգելիչ միջոցառումներ չեն ձեռնարկել: Միևնույն ժամանակ սանիտարական հաստատությունները բոլոր ցանկացողներին ապահովել են վիրուսի դեմ անվճար պատվաստով: Տեղական մամուլում ավելի հաճախ են սկսել գովազդներ տեղադրել` կոչ անելով բնակչությանը օգտվել այդ հնարավորությունից:
Առողջապահության նախարարության ներկայացուցիչները բնակչությանը կոչ են արել իրենց սննդակարգում ավելացնել այն մթերքները, որոնք հարուստ են վիտամին C-ով և D-ով, ինչպես նաև շատ հեղուկ ընդունել: Բնակչությանը խորհուրդ է տրվել նաև անհապաղ դիմել բժշկի, եթե հիվանդության ախտանիշեր նկատեն:
2009 թվականին Մեքսիկայում նոր գրիպի համաճարակ էր բռնկվել, որը իշխանություններին ստիպել էր արտակարգ իրավիճակ հայտարարել: Այդ ժամանակ մեկ տարվա ընթացքում երկրում գրանցվեց A/H1N1 վիրուսով վարակվածության 68 հազար դեպք: Մահացավ 800 մարդ: