Գնաճի զսպման մեխանիզմներ ՀՀ իշխանություններն ունեն, բայց անկախ փորձագետ Հայկ Բալանյանը
խիստ կասկած հայտնեց, որ դա կանեն: «Առաջին լրատվական»-ի հետ զրույցում Հ. Բալանյանը նշեց, որ գնաճն ընտրությունների հետ կապելու կարիք չկա, քանի որ ընտրությունների համար, ընտրվողների պատկերացումներով, փող ծախսելը կկատարվի ավանդական եղանակներով՝ ուղղակի փող բաժանել, գառ մորթել, ինչ-որ մարդկանց համար խնդիրներ լուծել, կամ ԲՀԿ-ի կողմից հիմա նորաձև դարձած առողջապահական ծառայությունների մատուցում ու կազմակերպում:
«ԱԺ ընտրություններից առաջ կուսակցությունների կամ թեկնածուների կողմից դրանք կլինեն ավելի շատ նպատակային միջոցառումների տեսքով, որոնք միշտ իրականացվել են: Կարծում եմ, այդ իմաստով ավանդույթի փոփոխություն տեղի չի ունենա: Այսինքն՝ մակրոտնտեսական քաղաքականությունն ինքն իր կյանքով է ապրելու, որի նպատակն է ապահովել գերշահույթներ իշխող վարչակարգի համար: Իսկ նախընտրական գովազդային քայլերը կկատարվեն ավանդական ճանապարհով՝ կոնկրետ տարածքում, այդ տարածքի բնակիչների հետ, գումարներ կամ նվերներ բաժանելով, սեղան գցելով և այլն»,- ասաց Հ. Բալանյանը:
