Մանկապղծության համար 15 տարվա ազատազրկման դատապարտված Սերոբ Տեր-Պողոսյանին այսօր չվիրահատեցին: Ամենայն հավանականությամբ նրան կվիրահատեն առաջիկա երկուշաբթի կամ երեքշաբթի օրերին: Այս մասին «Առաջին լրատվական»-ին ասաց Ա. Միքայելյանի անվան վիրաբուժության ինստիտուտի փոխտնօրեն Օնիկ Մելքոնյանը: Իսկ դատապարտյալի առողջական վիճակի առումով նա նշեց, որ Սերոբ Տեր-Պողոսյանի մոտ ախտորոշվել է հաստ աղիքի ուռուցք և լուրջ խնդիրներ կան աղիների բերանակցման շրջանում: Միքայելյանի հիվանդանոցի փոխտնօրենի խոսքով` սա բավականին բարդ վիրահատություն է, իսկ ուռուցքի չարորակ կամ բարորակ լինելը պարզ կդառնա միայն վիրահատությունից հետո:
Հիշեցնենք, որ Լոռու մարզի ընդհանուր իրավասության դատարանի կողմից մանկապղծության համար 15 տարի ազատազրկման դատապարտված Սերոբ-Տեր Պողոսյանը Ա. Միքայելյանի անվան վիրաբուժության ինստիտուտ է տեղափոխվել հունվարի 27-ին: Ըստ երեկվա տեղեկությունների` մանկապիղծին պետք է վիրահատեին այսօր առավոտյան, քանի որ տառապում է աղիքային քաղցկեղով, ինչի համար նախկինում նա ԱՄՆ-ում բուժվել է:
Պարզելու համար, թե Տեր-Պողոսյանի ախտորոշումը որքանով է մտնում պատիժը կրելուն խոչընդոտող ծանր հիվանդությունների ցանկում, փորձեցինք պարզել արդարադատության նախարարության քրեակատարողական վարչության հասարակության հետ կապերի վարչության պետ Գոռ Ղլեչյանից: Սակայն նա ասաց, որ այս պահին հիվանդությունների ցանկն իր ձեռքի տակ չունի և առաջարկեց, որ մենք ինքներս ուսումնասիրենք կառավարության համապատասխան թիվ 825 որոշումը: Իսկ ելնելով դրանից՝ կարելի է պատասխան գտնել «բարեգործ» Տեր-Պողոսյանի հետ կապված ամենահետաքրքիր հարցերից մեկին, թե արդյոք հիվանդության պատճառով նա կարո՞ղ Է պատժից խուսափել:
ՀՀ կառավարության թիվ 825 որոշմամբ սահմանված «Պատիժը կրելուն խոչընդոտող ծանր հիվանդությունների ցանկում» մանկապիղծ Տեր-Պողոսյանի ախտորոշմանը համապատասխանում է ըստ երևույթին հետևյալ բաժինը.
«3-րդ աստիճանի չարորակ նորագոյացություններ (անկախ տեղակայումից)` ըստ միջազգային TNM դասակարգման»: Արդյոք Սերոբ Տեր-Պողոսյանի ախտորոշումը համապատասխանո՞ւմ է կառավարության որոշման մեջ նշվածի հետ՝ պարզ կդառնա առաջիկայում: