Թուրքական Sabah թերթի փոխանցմամբ՝ նախորդ տարվա ապրիլի 24-ին Բամթանի նահանգի Քոզլուքի շրջանում սպանված հայազգի զինծառայող Սևակ Բալըքչըի գործով անցնող վկաներից մեկը խոստովանել է, որ կեղծ ցուցմունքներ է տվել և փոխել է իր ցուցմունքը։ Խոսքը Հալիլ Էքշիի մասին է, ով պատմել է հետևյալը.
«Սևակի սպանությունից հետո ինձ զանգահարեց Քըվանչ Աղաօղլուի (այս ազգայնականն է սպանել իր ծառայակից Սևակին) քեռին և ասաց, որ լավ կլինի, եթե ես ցուցմունք տամ իր ասած ձևով։ Ես էլ ստորագրեցի նրա տված թղթի տակ»։
Իր նոր ցուցմունքում Էքշին խոստովանել է, որ իրականում տեսել է Սևակի սպանության պահը, թե ինչպես է Աղաօղլուն զենքը պահում Սևակի վրա և կրակում։ Մինչդեռ նախկին կեղծ ցուցմունքում նա հակառակն էր պնդել։ Էքշին հավելել է, որ տեղյակ չէ այդ սպանության դրդապատճառների մասին։
Հիշեցնենք, որ նախորդ տարվա ապրիլի 24-ին Սևակի սպանությունից հետո Թուրքիայում ի հայտ եկան «1,500,000+1+1» խորագրով պաստառներ, որոնցից 1.5 միլիոնը խորհրդանշում էր Հայոց ցեղասպանության զոհերին, իսկ մնացածը՝ 2007 թվականի հունվարի 19-ին Ստամբուլում սպանված Հրանտ Դինքին և Սևակ Բալըքչըին։
