ՌԴ-ից հանրապետություն ներկրված բնական գազի ծավալները 2011 թ. ընթացքում ավելացել են 11.73 տոկոսով՝ կազմելով 1 մլրդ 609.062 մլն խմ՝ 2010 թ. 1 մլրդ 440.144 մլն-ի դիմաց:
Նշված ժամանակահատվածում «ՀայՌուսգազարդ» ՓԲԸ կողմից իրացվել է 1 մլրդ 534.941 մլն խմ, ինչը 12.72%-ով ավել է 2010 թ. համեմատ:
«ՀայՌուսգազարդ»-ից «Առաջին լրատվական»-ին հայտնեցին, որ նախորդ տարվա համեմատ ավելացել է բնական գազի սպառումը բնակչության կողմից՝ կազմելով 550.748 մլն խմ, ինչը 16.95%-ով ավելի է նախորդ տարվա ցուցանիշից: 29.08%-ով ավելացել են էներգետիկայի ոլորտի և 18.01%-ով այլ սպառողների կողմից գազի սպառման ծավալները՝ կազմելով համապատասխանաբար 187.533 մլն և 184.621 մլն խմ: 13.85%-ով ավելացել են ԱԳԼՃԿ-ների կողմից իրացված բնական գազի ծավալները՝ կազմելով 362.364 մլն խմ: Այսինքն՝ Հայաստանում գազով շահագործվող ավտոմեքենաները 2011-ին բերված տվյալի չափով ավելի շատ գազ են սպառել, քան 2010-ին:
Նշված ժամանակահատվածում 7.81%-ով նվազել են արդյունաբերության ոլորտի սպառման ծավալները՝ կազմելով 249.675 մլն խմ՝ 2010 թ. 270.835 մլն-ի դիմաց: