Ֆրանսիայի ոստիկանությունը նոր քաղաքականության շրջանակներում զանգվածաբար ձերբակալում է (երբեմն անհիմն) սևամորթներին և արաբներին: Այս մասին հաղորդվում է Human Rights Watch իրավապաշտպան կազմակերպության զեկույցում:
Ինչպես հաղորդում է Reuters գործակալությունը, ներքին քաղաքականության խստացումը Ֆրանսիայի նախագահ Նիկոլա Սարկոզիի նախընտրական ծրագրի մի մասն է: Անցյալ շաբաթ երկրի կառավարությունը հայտարարեց, որ 2011 թ. հանցավորության մակարդակն իջել է:
Զեկույցում նշվում է, որ Ֆրանսիայի օրենքների համաձայն՝ ոստիկանությունը իրավունք ունի ձերբակալել ցանկացած մեկին, եթե անգամ որևէ ապացույց չկա նրա դեմ կամ եթե անգամ հանցագործություն չի կատարվել:
«Սա ապշեցնող փաստ է, որ սևամորթ երիտասարդները և արաբները կարող են ստորացուցիչ ձերբակալությունների ենթարկվել նույնիսկ այն դեպքում, եթե ոչ մի ապացույց չկա, որ նրանք հանցանք են գործել»,- հայտարարել է Արևմտյան Եվրոպայում կազմակերպության ներկայացուցիչ Ջուդիթ Սանդերլենդը:
Նրա խոսքերով, հնարավոր չէ հստակ որոշել՝ 13 տարեկանից բարձր քանի երիտասարդ է ձերբակալվում, քանի որ նման ձերբակալությունների ժամանակ ոչ մի փաստաթուղթ չի ձևակերպվում:
Ֆրանսիայում, որտեղ մեծ թիվ են կազմում Աֆրիկայի և Մերձավոր Արևելքի բնակիչները, հաճախ են բախումներ տեղի ունենում ոստիկանության և հավասարություն պահանջող ներգաղթյալների միջև:
