Որևէ մեկի համար գաղտնիք չէ, թե ինչ անմիջական աջակցություն են ցուցաբերում հարազատ կուսակցությանը հայաստանյան բուհերը նախընտրական շրջանում` իրենց ռեկտորներով, մանավանդ բուհերի ուսանողական խորհուրդները` ՀՀԿ-ին անմնացորդ նվիրված իրենց նախագահներով, որոնք ընտրությունից ընտրություն ասես սրբազան պարտք են կատարում և, չգիտես ինչու, միայն իրենք են նկատում օրեցօր շենացող Հայաստանը:
Ու թեև օրերս ԿԳ նախարարը հրահանգել է բուհերի ռեկտորներին և դպրոցների տնօրեններին` հետևել օրենսդրությանը, որն արգելում է քաղաքական գործընթացներն ուսումնական հաստատություններում, չանել ոչ մի քարոզչություն, չկազմակերպել ոչ մի քաղաքական հանդիպում և միջոցառում բուհի տարածքում (բուհից դուրս յուրաքանչյուր ռեկտոր, դասախոս, ուսանող իրավունք ունի լինել կուսակցության անդամ, գնալ միտինգների, հավաքների, քարոզչություն անել և այլն, բայց ոչ աշխատանքային ժամի կամ դասերի հաշվին), բայց գիտենք, որ սա ձևական բնույթ է կրելու, քանի որ ուսխորհուրդները ջանք ու եռանդ չեն խնայելու իրենց ավանդական նվիրվածությունն ի ցույց դնելու. նրանք դա չեն էլ թաքցնում: «Կրթական համակարգում քաղաքական ժամանակավոր զարգացումների ինչ-որ բացասական էլեմենտների ներմուծումն անթույլատրելի է: Վերջապես պետք է չմոռանալ, որ դասերը մնայուն են, իսկ ընտրությունները` անցողիկ: Ահա սա է իմ բանաձևը»,- նշել է նախարարը:
Զավեշտալի է, որ մեր բուհերից միայն ԵՊՀ ուսանողական խորհրդի նախագահը` Ցոլակ Հակոբյանը, կուսակցական չէ: Վերջինս, սակայն, մեզ հետ զրույցում չժխտեց նաև իր` ՀՀԿ-ին անմնացորդ նվիրված լինելու փաստը և ափսոսեց, որ ԵՊՀ կանոնադրությունն արգելում է կուսակցական լինելու հանգամանքը. «Երբ այլևս ուսխորհրդի նախագահ չլինեմ, դրանից հետո շատ հավանական է, որ դառնամ ՀՀԿ անդամ»: Նա նշեց, որ համալսարանում արգելվում է քաղաքական քարոզչություն նախընտրական շրջանում, որ ուսխորհուրդն ապաքաղաքական կառույց է, սակայն չժխտեց, որ նախընտրական պրոցեսներում ակտիվանում են ուսանողները, քաղաքական ուժեր են փորձում գործընթացների մեջ մտնել, դրա համար իրենք ամեն ինչ պետք է անեն, որ օրենքի այդ դրույթը պահպանեն, և համալսարանը ապաքաղաքական կառույց մնա:
Ու քանի որ ուսխորհրդի նախագահները տարիներ հետո բարձր պաշտոններ են ստանձնում, հետաքրքրվեցինք, թե ինչ ամբիցիաներ ունի Ցոլակ Հակոբյանը. «Մասնագիտությամբ քաղաքագետ եմ, մասնագիտություն ընտրելու ժամանակ ես որոշել էի քաղաքական գործիչ դառնալ, և այդ առումով ուսխորհուրդը առաջին մեծ դպրոցն է: Միայն Հայաստանում չէ, որ ուսխորհրդի նախագահներն առաջ են գնում, ունենք Եվրոպայի փորձը, բնականաբար, եթե մարդիկ ընդունակություններ ունեն, առաջ են գնում, հասարակական կյանքում, կարիերայում»,- խոստովանեց նա:
ՀՊՄՀ ուսխորհրդի նախագահ Վոլոդյա Գասպարյանը, օրինակ, այնքան է սիրում ՀՀԿ-ին, որ կրծքանշանով է ման գալիս (2003-ից է ՀՀԿ-ական դարձել) և ասուլիսներին ներկայանում և չի թաքցնում, որ ՀՀԿ անդամ է և զբաղվում է կուսակցական գործունեությամբ: Այսքանից զատ, նա նշեց, որ մանկավարժական համալսարանը, ըստ օրենքի, զերծ է քաղաքականությունից, և համալսարանը կատարում է օրենքով սահմանված պահանջները: Ուսխորհուրդը, հիշեցրեց Վոլոդյա Գասպարյանը, ուսանողական գործունեության, ինքակառավարման մարմին է, իրականացնում է ուսանողների իրավունքների պաշտպանությունը և հետևում է, որ ուսանողները կատարեն իրենց պարտականությունները: Իսկ թե ուսանողներից քանի տոկոսը կլինեն ՀՀԿ-ական, ուսխորհրդի նախագահը դժվարացավ պատասխանել, փոխարենը հիշեցրեց, որ համալսարանում ուսանողի հիմնական ֆունկցիան կրթություն, «բարձր գիտելիքներ» ձեռք բերելն է, որ բուհն ավարտելուց հետո դառնան մասնագետ, «զարգացնենք տնտեսությունը, որ ունենանք բարեկեցիկ Հայաստան», իսկ մենք հիմա, նրա խոսքերով, գնում ենք բարեկեցիկ Հայաստանի ճանապարհով:
Հարցին` ինչպես զգացիք, որ Ձեր գաղափարախոսությունը հանրապետական կուսակցության գաղափարախոսությանն է մոտ, նշեց. «Ես գաղափարներն էի կիսում, կանոնադրությանն էի ծանոթ, ծրագրին էի ծանոթ, և հետևաբար կատարել եմ իմ ընտրությունը: ՀՀԿ-ն այն եզակի կուսակցություններից է, որը ունի հստակ քաղաքական կողմնորոշում, գաղափարախոսություն, պատմական արմատներ, որի միջոցով կարելի է հասնել մեր երազանքների Հայաստանին: ՀՀԿ կատարած աշխատանքները բոլորն են տեսնում»: Վոլոդյա Գասպարյանին ուսխորհրդի նախագահ լինելը նպատակին հասնելու կարողություն է ցույց տալիս. «Ուսխորհուրդը այն եզակի կառույցներից է, որը հնարավորություն է տալիս երիտասարդին կայանալու, դրսևորելու իրեն կոլեկտիվի մեջ, և այդ աշխատանքային փորձը, իսկ թե ինչ ապագա կունենանք` հետագան ցույց կտա»:
Բրյուսովի անվան լեզվաբանական համալսարանի ուսխորհրդի նախագահ Հասմիկ Ափյանը նշեց, որ ՀՀԿ անդամ է, բայց շտապեց ավելացնել, որ իրենց ուսանողական խորհուրդը քաղաքական որոշակի հայացքների չի հետևում, որ իրենց հիմնական նպատակը ուսանողների իրավունքները, շահերը ներկայացնելը և պաշտպանելն է: Թեև Հասմիկ Ափյանը մեկ տարի է` ՀՀԿ անդամ է, սակայն նշեց, որ իրենց խորհրդում տարբեր կուսակցություններից, անգամ ընդդիմադիրներ կան: Նա թերևս միակն է, որ նշեց` պաշտոնի ձգտում հետագայում չի ունենա, որովհետև իգական սեռի ներկայացուցիչ է և ինչ-որ հավակնություններ չունի:
Իսկ ամենաանկեղծը մեզ հետ զրուցեց Թատերական համալսարանի ուսխորհրդի նախագահ Վարդգես Բարսեղյանը, որը թեև նշեց, որ մյուս ինստիտուտները ակտիվանում են այս ընթացքում, բայց իրենք պասիվ են, քանի որ իրենց մոտ աշխատանքային պրոցես է. «Մենք այդ առումով տարբերվում ենք մյուս բուհերից, և մեզ քաղաքական վիճակը չի հետաքրքրում: Ես կուսակցական չեմ, բայց իհարկե աշխատում են ՀՀԿ-ի հետ, իրականացրել ենք ծրագրեր երիտասարդական հիմնադրամի հետ»: Հարցին` որևէ կերպ դերակատարություն չե՞ն ունենալու նախընտրական պրոցեսներում, պատասխանեց, որ անպայման կունենան, որովհետև պետք է նաև օգնեն, թեև դեռ ոչ մի խոսակցություն չկա, դեռ որևէ պայմանավորվածություն ձեռք չեն բերել: Կօգնեք ընտրությունների արդար և թափանցիկ անցկացմա՞նը, թե՞ ՀՀԿ-ին աջակացելու առումով, պատասխանեց, որ ուսխորհուրդը նախ կաջակցի իշխող ուժին, որովհետև իշխող ուժը իրենց միշտ օգնել է, աջակցել է, հիմա էլ իրենք պետք է օգնեն և աջակցեն նրանց:
«Ժամանակ»
Լուսանկարը` Armenianow.am-ի
