Ադրբեջանական APA լրատվական գործակալության փոխանցմամբ՝ Միջազգային ճգնաժամային խմբի (ICG)՝ Հարավային Կովկասի նախագծերի տնօրեն Լոուրենս Շիթսն անդրադարձել է երեկ Սոչիում կայացած Հայաստանի, Ադրբեջանի ու Ռուսաստանի նախագահների 10-րդ եռակողմ հանդիպմանը, որում քննարկվել է ղարաբաղյան հակամարտության կարգավորումը.
«Նախագահների յուրաքանչյուր հանդիպում դրական արդյունք է, սակայն ընդունված փաստաթղթի տեքստից երևում է, որ այդ հանդիպումն էական փոփոխություններ չի մտցրել համապարփակ խաղաղության համաձայնագրին հասնելու հարցում։
Հաշվի առնելով, որ նախագահները հակամարտության կարգավորման «հիմնարար սկզբունքների» մասին խոսում են 2005 թվականից սկսած, և որ իրենք մի քանի անգամ մոտ են եղել համաձայնագրի կնքմանը՝ դա մեծ արդյունք չէ։ Այլ կարևոր հարցերի շուրջ ձեռք չի բերվել համաձայնություն։ Դա մասնավորապես վերաբերում է շփման գծից դիպուկահարների հետքաշմանը և հրադադարի ռեժիմի խախտման դեպքերի կանխման ու հետաքննման մեխանիզմի ստեղծմանը։
Ղարաբաղյան հակամարտության կարգավորման հարցում առաջընթացի գրանցմանը կարող են խոչընդոտել Հայաստանում ու ԵԱՀԿ Մինսկի խմբի համանախագահող երկրներում սպասվող ընտրությունները։ Ղարաբաղյան հակամարտության կարգավորման շուրջ տիրող լարվածությունը վտանգ է ներկայացնում։ Միջին հեռանկարում կարող է բռնկվել լայնամասշտաբ պատերազմ, ինչը դժվար կլինի երկու կողմերի համար էլ և անկանխատեսելի ու կործանարար հետևանքներ կունենա ողջ տարածաշրջանի համար»։
