Սարգսյան-Մեդվեդև-Ալիև` երեկ Սոչիում կայացած հանդիպման ավարտին ընդունված համատեղ հայտարարությունը համահունչ էր հայկական կողմի դիրքորոշմանը: Այսօր կայացած մամուլի ասուլիսի ժամանակ այս մասին հայտարարեց ԱԺ փոխխոսնակ Էդուարդ Շարմազանովը: Ըստ նրա, Հայաստանն ու Արցախը մշտապես խոսել են խնդրի խաղաղ կարգավորման մասին:
«Ամրագրվեց այն փաստը, որ խնդիրը պետք է ունենա բացառապես խաղաղ լուծում: Ադրբեջանը լինելով ՄԱԿ-ի ԱԽ ոչ մշտական անդամ` ցանկանում է խնդիրն այլ հարթություն տեղափոխել: Բայց փաստաթղթում երեկ նշվեց, որ խնդիրը պետք է լուծվի միայն ԵԱՀԿ Մինսկի խմբի շրջանակներում»,- նկատեց ԱԺ փոխխոսնակը:
Նրա խոսքով` Հայաստանն իր քաղաքացիներին պատերազմի չի պատրաստում, մինչդեռ Ադրբեջանի քաղաքականությունը հիմնված է ռասիզմի և հայաֆոբիայի վրա:
«Չնայած սա մեր ցանկացած փաստաթուղթը չէր և բեկումնային առաջընթաց չապահովեց , վերջնական լուծումներ չէր առաջարկում, բայց ազդակ եղավ, որ Ադրբեջանը հայտնի կենդանու համառությամբ չգնա ապակառուցողական քաղաքականության»:
Շարմազանովի խոսքով` Արցախի անկախությունն այլընտրանք չունի, և նա պետք է բանակցությունների լիարժեք կողմ լինի:
