Ռուսաստանի ընդդիմադիր կազմակերպությունների և քաղաքացիական հասարակության ներկայացուցիչները Մոսկվայի քաղաքապետարան հայտ են ներկայացրել փետրվարի 4-ին հանրահավաք կազմակերպելու վերաբերյալ: Այս մասին հայտնում է Интерфакс-ը:
Ծանուցումը հանձնել են գրող Դմիտրի Բիկովը, իրավաբան Ելենա Լուկյանովան, «Համերաշխություն» շարժման մասնակիցներ Սերգեյ Դավիդիսը և Նադեժդա Միտյուշկինան, «Սպիտակ ժապավեն» շարժման ներկայացուցիչ Իգոր Բակիրովը, լրագրող Սերգեյ Պարխոմենկոն և «Ձախ ճակատի» մամուլի քարտուղար Անաստասյա Ուդալցովան:
Նադեժդա Միտյուշկինան գործակալությանը հաստատել է, որ կազմակերպիչները մտադիր են հանրահավաքը սկսել Կալուգյան հրապարակից: Ենթադրվում է, որ ակցիային մասնակցելու է 50 հազար մարդ: Այս ցույցն անվանել են «համաքաղաքացիական»:
Միտյուշկինայի խոսքերով՝ «մարդիկ այնպես են տրամադրված, որ պատրաստ են փողոց դուրս գալ նույնիսկ առանց համաձայնության»: Այդ պատճառով իշխանությունները ամեն դեպքում համաձայնության կգան: «Ամեն դեպքում, քաղաքապետարանն առաջարկելու է այլ տարբերակներ, և մենք դրանք կքննարկենք»,- պարզաբանել է Միտյուշկինան:
Ավելի վաղ հակասական տեղեկություններ էին տարածվել այն մասին, թե արդյոք քաղաքապետարարնը կթույլատրի՞ հանուն արդար ընտրությունների հանրահավաքը: Այս թեման քննարկվել է ընդդիմադիր քաղաքական գործիչների` Մոսկվայի փոխքաղաքապետ Ալեքսանդր Գորբենկոյի հետ վերջերս ունեցած հանդիպման ժամանակ: Այդ ժամանակ «Ժողովրդական ազատություն» կուսակցություն համանախագահ Բորիս Նեմցովը հայտնել էր, որ քաղաքապետարանը ցանկացել է ակցիան տեղափոխել փետրվարի 5-ին, քանի որ կիրակի օրը երթևեկությունը զգալիորն նվազում է: «Ինչ վերաբերում է շաբաթ օրվան, ապա այդ օրը իշխանությունները պատրաստ են առաջարկել ակցիան սկսել Ֆրունզենյան ափամերձ շրջանից»,- ասել է «Արդար Ռուսաստան» կուսակցության ներկայացուցիչ, Պետդումայի պատգամավոր Դմիտրի Գուդկովը:
Փետրվարի 4-ի հանրահավաքի կազմակերպիչները նշում են, որ այս հանարհավաքը գրեթե համընկնում է 1990 թ. փետրվարի 4-ի հանրահավաքի հետ, որից հետո Սահմանադրությունից բացառվել է Կոմունիստական կուսակցության ղեկավար դերը:
