Համակարգչային մարմնամարզության խաղերը կարող են օգնել 50–ից բարձր տարիք ունեցողներին կանխել հիշողության կորուստը և երիտասարդ մնալ:
Գիտնականները, հիմնվելով նոր հետազոտության արդյունքների վրա, պնդում են, որ միայն մարմնամարզությունն այնքան էլ արդյունավետ չէ, որքան այն ժամանակ, երբ այն զուգակցվում է ինտերակտիվ մթնոլորտի և վիրտուալ իրականության հետ: Այս կերպ ուղեղն ավելի արագ է աշխատում:
Daily Mail-ը գրում է, որ Նյու Յորքի The Union College-ի գիտնականները համեմատել են 50-ն անց մարդկանց արդյունքները, որոնց մի մասը հեծանիվ է քշում, իսկ մյուս մասն այդ ընթացքում նաև համակարգչային խաղեր է խաղում: Նրանք, ովքեր համակարգչային խաղերն օգտագործել են իրենց մարզումների ընթացքում, ուղեղի ավելի արագ աշխատանք են ունեցել:
Գիտնականները գտնում են, որ այս խաղերը կանխում են խաղացողի մտավոր անկումը և օգնում են լուծել հիշողության հետ կապված խնդիրներն առավել լավ, քան միայն մարմնամարզությունը:
Հետազոտության գլխավոր հեղինակ Քեյ Անդերսոն Հանլին ասել է, թե իրենք պարզել են, որ վիրտուալ իրականությունը և ինտերակտիվ վարժություններն օգնում են մեծահասակների շրջանում զարգացնել մտավոր կարողությունները: