Եգիպտոսի մայրաքաղաքի կենտրոնում գտնվող նախագահական Աբդին պալատի պահեստում հայտնաբերվել է Աստվածաշնչի հնագույն ձեռագիր: Այս մասին հայտնում է բոլոր պալատների գույքագրման հարցերով զբաղվող հանձնաժողովի ղեկավար Ահմեդ Իդրիսը:
Ինչպես գրում է Al-Gumhuriya թերթը, Ահմեդի խոսքերով, ստեղծվելու է գիտնականներից և պատմաբաններից կազմված հատուկ հանձնաժողով, որն ուսումնասիրելու է Սուրբ գրքի տեքստը և պարզելու է, թե երբ է այն գրվել: Ակնհայտ է, որ հայտնաբերված Աստվածաշունչը «անգին է և եզակի ամբողջ աշխարհում», քանի որ «հնագույն ձեռագիրը համարվում է բնօրինակ»:
Աբդին պալատը բացվել է 1874 թվականին: Նախապես այն եղել է թագավորական առանձնատներից մեկը, ավելի ուշ անցել է երկրի նախագահի տնօրինությանը: Այն համարվում է աշխարհի շքեղագույն պալատներից մեկը: Այժմ վերածվել է թանգարանի, չնայած մինչև վերջերս պալատի մի հատվածը նախագահի գրասենյակի մի մասն էր:
Իդրիսի փոխանցմամբ՝ մինչև այս պահը գույքագրման բաժինը չի հայտնաբերել կորած կամ գողացված իր: Պալատի հարստություններից են եզակի ձեռագործ միջնադարյան գորգերը, որոնք գնահատվում են 65 միլիոն դոլար:
Այս շաբաթ հանձնաժողովը սկսելու է պալատի այն հատվածի հետազոտությունը, որտեղ տեղակայված էին Եգիպտոսի նախկին նախագահ Հոսնի Մուբարաքի և նրա կնոջ` Սյուզան Մուբարաքի հարկաբաժինները: Այդտեղ պահվում են այն նվերները, որոնք ժամանակին տրվել են պետության նախկին ղեկավարին: