Գերմանիայի Դաշնային Հանրապետության ԱԳ նախարարությունը Լիբիայի նախկին առաջնորդ Մուամար Քադաֆիի որդուն` Սեյֆ Ալ-Արաբին տվել էր ժամանակավոր կացության իրավունք, մինչդեռ նա չի ունեցել անհրաժեշտ փաստաթղթեր երկրում ապրելու իրավունք ստանալու համար:
Ինչպես հայտնում է Sueddeutsche Zeitung-ը, 24-ամյա Սեյֆ Ալ-Արաբը Մյունխեն էր ժամանել իտալական վիզայով՝ 2006 թվականին: Գերմանիայի տարածքում գտնվելու համար անհրաժեշտ էր, որ նա գրանցվի և ստանա համապատասխան փաստաթղթեր, ինչը Քադաֆիի որդին չի արել: Պարբերականը նշում է, որ Գերմանիայի ԱԳՆ-ն Բավարիայի ՆԳՆ է ուղարկել նամակ`խնդրելով օգնել Սեյֆ Ալ-Արաբին գրանցման հարցում` հաշվի առնելով «Գերմանիայի Դաշնային Հանրապետության շահերը Լիբիայի հետ տնտեսական համագործակցության բնագավառում»:
Քադաֆիի որդին Բավարիայում ապրել և սովորել է մինչև 2011 թվականը: Ավելի վաղ հայտնվել էր, որ այդ ընթացքում նրա դեմ հարուցվել է 11 դատական գործ` տարբեր հոդվածներով՝ ներառյալ զենքի անօրինական շրջանառությունը, մասնակցությունը վիճաբանություններին և ոստիկանության աշխատակիցներին վիրավորանքներ հասցնելը: Պարբերականը նշում է, որ Սեյֆ Ալ-Արաբը կասկածվում էր նաև մահափորձի մեջ, սակայն հետաքննության արդյունքում նրա մեղքը ապացուցել հնարավոր չեղավ:
Ներկայումս Սեյֆ Ալ-Արաբի հովանավորի նկատմամբ հետաքննությամբ զբաղվում է Նյուրնբերգի դատախազությունը: Մյունխենի ավագ դատախազ Ավգուստ Շտերնին Նյուրնբերգի գործընկերները մեղադրում են արդարադատությանը խոչընդոտելու մեջ: Շտերնին կասկածում են այն բանում, որ Սեյֆ Ալ-Արաբի Վալդպերլախ առանձնատան ստուգումների ժամանակ զենք չի հայտնաբերվել:
Հիշեցնենք, որ Սեյֆ Ալ-Արաբը սպանվել է 2011 թվականի մայիսին Տրիպոլիում ՆԱՏՕ-ի ռմբակոծությունների ժամանակ:
