ԱՄՆ-ը պատրաստ է Մյանմային օգնություն ցուցաբերել՝ երկրում իրականացնելու քաղաքական բարեփոխումներ:
Այս մասին ԱՄՆ-ը հայտնեց շաբաթ երեկոյան պետքարտուղար Հիլարի Քլինթոնի՝ Մյանմայի արտաքին գործերի նախարարի ու ընդդիմության ղեկավարի հետ հեռախոսազրույցներից հետո:
Ինչպես գրում է «Ազատություն» ռադիոյի ռուսական ծառայությունը, հեռախոսազրույցները տեղի են ունեցել այն բանից հետո, երբ Մյանմայի կառավարությունը համաներում է հայտարարել ու ազատ արձակել 650 մարդու, որոնցից 300-ը քաղբանտարկյալներ էին:
Հիշեցնենք, որ ԱՄՆ-ը այս քայլը շատ դրական է համարել և նշել, որ երկու երկրների հարաբերությունները կարող են այնպես ընթանալ, որ ի վերջո ԱՄՆ-ը սկսի բանակցել Մյանմայի հետ դեսպանների փոխանակման հարցի շուրջ:
Նշենք, որ Մյանմայում երկու տասնամյակ ղեկավարում էին զինվորականները: Վերջին տարիներին Մյանման սկսել է բացվել աշխարհի համար, իսկ կառավարությունն իրականացնում է մի շարք բարեփոխումներ: