Մարտի 1-ի զոհերից Տիգրան Խաչատրյանի մայրը՝ Ալլա Հովհաննիսյանը, դժգոհ է ԵԽԽՎ Մոնիտորինգային կոմիտեի համազեկուցողներ Աքսել Ֆիշերի և Ջոն Պրեսկոտի աշխատանքից և նրանց՝ օրերս Հայաստան կատարելիք այցից առանձնապես մեծ ակնկալիքներ չունի: Այս մասին նա ասաց «Առաջին լրատվական»-ի հետ զրույցում:
«Վերջին անգամ, երբ նրանք Հայաստանում էին և այստեղից գնալուց հետո հայտարարեցին, որ Մարտի 1-ի էջը կարելի է փակված համարել, նույնիսկ չէին էլ հանդիպել մեզ հետ: Ես գտնում եմ, որ եթե համազեկուցողներն իրենց առանցքային հարցերից մեկը նշել են Մարտի 1-ին 10 անձանց սպանությանը վերաբերող ԵԽԽՎ 1837 բանաձևի դրույթների իրականացմանն առնչվող խնդիրը, ապա պետք է անպայման մեզ հետ հանդիպեն»,- ասաց Ալլա Հովհաննիսյանը:
Նրա տեղեկացմամբ, համազեկուցողների՝ Երևան սպասվելիք այցի մասին տեղեկանալուց հետո իր և մյուս զոհերի հարազատների անունից ինքը Աքսել Ֆիշերի և Ջոն Պրեսկոտի հետ հանդիպման խնդրանքով դիմում է ներկայացրել ԵԽԽՎ երևանյան գրասենյակ: «Դիմումում նշել եմ, որ մենք՝ զոհերի հարազատներս, տեղեկություններ ունենք սպանությունների վերաբերյալ, որոնց մասին ցանկանում ենք տեղեկացնել համազեկուցողներին: Քիչ առաջ ինձ զանգահարեց ԵԽԽՎ երևանյան գրասենյակի աշխատակցուհին, և ասաց, որ համազեկուցողները, տեղեկանալով, որ զոհերի ծնողներն իրենց հետ հանդիպում են խնդրում, նշել են՝ կգանք Երևան, այդ ժամանակ էլ կտեսնենք՝ հարմար է հանդիպում նշանակել, թե ոչ: Այսինքն՝ ոչ մերժել են մեր խնդրանքը, ոչ էլ հանդիպման օր են նշանակել: Եթե Ֆիշերն ու Պրեսկոտը չցանկանան հանդիպել մեզ հետ, ապա մենք ԵԽԽՎ գրասենյակի մոտ ակցիա կանենք: Շատ վիրավորական է, երբ եվրոպացի պաշտոնյաները մեր հանդեպ երկակի ստանդարտներ են կիրառում: Իմ երեխան Հունաստանում զոհված տղայից վատը չէ, երբ նրան սպանող ոստիկանին ցմահ բանտարկության են դատապարտում, իսկ իմ երեխային սպանող ոստիկանը ոչ միայն շարունակում է աշխատել համակարգում, դեռ մի բան էլ իմ և իմ ընտանիքի համար վտանգ է ներկայացնում»,- ասաց Տիգրան Խաչատրյանի մայրը:
Ամփոփելով՝ Ալլա Հովհաննիսյանը նկատեց, որ Մարտի 1-ի իրադարձությունների վերաբերյալ ՀՔԾ՝ ամիսներ առաջ ներկայացրած միջանկյալ զեկույցում բոլոր տվյալները խեղաթյուրված են: «Մասնավորապես, փորձ է արվում արատավորել զոհերին, նրանց ներկայացնել որպես պոտենցիալ հանցագործ»,- ասաց Ալլա Հովհաննիսյանը:
Նշենք, որ ԵԽԽՎ Մոնիտորինգային կոմիտեի համազեկուցողներ Աքսել Ֆիշերը և Ջոն Պրեսկոտը Հայաստան կայցելեն հունվարի 16-ին: