Տարին ընտրական է, և ՀՀԿ-ն թե խորհրդարանական, թե նախագահական ընտրությունները դիտարկում է որպես մեկ միասնական գործընթաց: Այսօր հանդիպելով լրագրողների հետ` հայտարարեց ՀՀԿ-ական պատգամավոր Գագիկ Մելիքյանը:
«Ներկայումս կուսակցությունում կատարվում են նախապատրաստական, կազմակերպչական բնույթի աշխատանքներ` շտաբների կազմավորում, համախոհների համախմբում, կուսակցական աշխատանքների ակտիվացում, կուսակցական նոր գրասենյակների բացում: Այն, ինչ կորոշի կուսակցության գործադիր մարմինը, դա էլ հասարակությանը կներկայացվի որպես ՀՀԿ նախընտրական ծրագիր:
Մեզ համար շատ կարևոր է, որ խորհրդարանական ընտրություններից անմիջապես հետո անցում կատարենք նախագահական ընտրությունների կազմակերպչական աշխատանքներին»,- ասաց նա:
Գագիկ Մելիքյանի խոսքով` երկրում, անխոս, առկա են սոցիալական խնդիրներ, սակայն դրանք չեն կարող պատճառ լինել, որ հասարակությունը քիչ վստահի իշխանություններին և ՀՀԿ-ին քիչ քվեներ տա:
«Կարծում եմ, որ առաջիկա խորհրդարանական ընտրություններից հետո ժողովրդի սոցիալական կյանքում դրական առաջընթաց կգրանցվի: Մեր ծրագրային հիմնադրույթներում կընդգրկվեն նոր աշխատատեղերի հիմնման, տնտեսության զարգացման կետեր, որոնք էլ կօգնեն բարելավել հասարակության սոցիալական վիճակը»:
Անդրադառնալով հարյուր տոկոսանոց համամասնական ընտրակարգին անցում կատարելու «Ժառանգության» և ՀՅԴ-ի համատեղ առաջարկին` ՀՀԿ-ական պատգամավորը նկատեց, որ վերոնշյալ երկու կուսակցությունների այս նախաձեռնությունն ընդամենը պոպուլիստական քայլ է:
«Նման քննարկումները նախ` պետք է անցկացվեին Ընտրական օրենսգրքում փոփոխություններ կատարելուց առաջ: Սա ուշացած նախաձեռնություն է 2012-ի , միաժամանակ խիստ վաղաժամ`հաջորդ` 2017 թվականի խորհրդարանական ընտրությունների տեսանկյունից: Սա ընդամենը նախընտրական քարոզչական, պոպուլիստական փուչիկ է: Այս առաջարկությունը չարժե ուռճացնել, և պետք է դիտարկե լ հետևյալ համատեքստում. ընդդիմությունը նախապես հայտարարում է հարյուր տոկոսանոց համամասնական ընտրակարգին անցում կատարելու մասին, որպեսզի մայիսին կայանալիք ընտրություններին բարձր արդյունքներ չգրանցելու դեպքում ասի` «տեսեք, իշխանությունը չհամաձայնեց մեր առաջարկին, դրա համար էլ մենք քիչ թվով քվեներ ստացանք»,- ասաց ՀՀԿ-ական պատգամավորը:
Հիշեցնենք, որ հարյուր տոկոսանոց համամասնական ընտրակարգին անցում կատարելու համատեղ առաջարկով հանդես էին եկել ՀՅԴ և «Ժառանգություն» կուսակցությունները: Այդ առաջարկին արձագանքել են ՀԱԿ-ը, «Ազատ դեմոկրատներ»-ը և քաղաքական մի շարք այլ ուժեր:
