Հունվարի 11-ին Հայ առաքելական սուրբ եկեղեցու վիրահայոց թեմի առաջնորդ գերաշնորհ տեր Վազգեն եպիսկոպոս Միրզախանյանի առաջնորդությամբ, Վրաստանի հայ համայնքի ներկայացուցիչներ Վրաստանի նախագահի խորհրդական, «Վրաստան» թերթի խմբագիր Վան Բայբուրթյանը, թեմական խորհրդի անդամ Ալեքսանդր Ութմազյանը և Վիրահայոց թեմի առաջնորդի օգնական Միքայել Ավագյանը այցելել են Վրաց ուղղափառ եկեղեցու պատրիարքարան և հավատացյալ հայության կողմից ամանորյա և սուրբծննդյան շնորհավորանքներ փոխանցել են Համայն վրաց կաթողիկոս-պատրիարք Իլյա Երկրորդին:
Պատվիրակությանը ուղեկցել են նաև Վրաստանում ՀՀ դեսպանության առաջին քարտուղար Վահագն Աֆյանը:
Վիրահայոց առաջնորդ Տեր Վազգեն եպիսկոպոս Միրզախանյանը, շնորհավորելով պատրիարքին, երախտագիտություն հայտնեց վրաց և հայ եկեղեցիների բարեկամությունը պահպանելու և ջերմ ընդունելության համար:
Թեմի առաջևորդն իր մտահոգությունն է հայտնել Թբիլիսիի հայկական պատմական թաղամասի եկեղեցիների, մանավանդ Սուրբ Նշան և Սուրբ Նորաշեն տաճարների վթարային վիճակի վերաբերյալ:
Նա խնդրել է Նորին սրբության միջամտությունը խնդրի լուծման կապակցությամբ, առաջարկելով եկեղեցիները վերադարձնել Հայոց թեմին, որպեսզի հայ հավատացյալների ուժերով վերականգնվեն դրանք կամ մինչև հարցերի վերջնական լուծումը՝ Վրաստանի իշխանությունները հոգատար լինեն տաճարների վերականգնման և պահպանման գործին:
Համայն վրաց պատրիարք Իլյա Երկրորդը շնորհավորել է Վրաստանում բնակվող հայությանը, գնահատել նրա ներդրումը ինչպես անցյալում, այնպես էլ այսօրվա Վրաստանի կյանքում` հորդորելով հաճախակի դարձնել հայ-վրացական մշակութային և հոգևոր շփումները, և հույս հայտնել, որ իր միջամտությունը կբերի բարձրացված հարցի լուծման առնչությամբ: