Քիմիական նյութը, որը որպես պահպանական միջոց է օգտագործվում կոսմետիկայում, սննդամթերքում և դեղագործությունում, հայտնաբերվել է կրծքի քաղցկեղով հիվանդ 40 կանանցից վերցրած հյուսվածքների նմուշներում:
Daily Mail-ը գրում է, որ 1998 թվականից արված մի քանի հետազոտություններ անհանգստություններ են առաջացրել կրծքի քաղցկեղի առաջացման մեջ պարաբենների հավանական դերի մասին:
Պարաբենները քիմիական միացություններ են, որ պարունակվում են ամենօրյա օգտագործման համար անհրաժեշտ միջոցներում` ներառյալ ատամի մածուկում, օճառներում դեզոդորանտներում և այլն:
Դրանք նաև հանդիպում են նրբերշիկներում, երշիկներում, խմորեղեններում: Բայց մինչ այժմ կրծքի քաղցկեղի և պարաբենների միջև կապը չի հաստատվել:
University of Reading-ի գիտնականների հետազոտության ընթացքում ուսումնասիրվել են հյուսվածքների 160 նմուշներ, որոնք վերցվել են կրծքի քաղցկեղ ունեցող կանանցից: Պարզվել է, որ հյուսվածքների 99 տոկոսը պարունակում է գոնե մեկ տեսակի պարաբեն, իսկ 60 տոկոսը` հինգը:
