Apple ընկերությունը ձեռք է բերել ֆլեշ-հիշողության մոդուլ արտադրող իսրայելական Anobit ընկերությունը: Այս մասին հայտնում է Bloomberg գործակալությունը` վկայակոչելով Apple-ի ներկայացուցչին:
2011 թվականի չորրորդ եռամսյակում Apple-ը գնել է NAND ֆլեշ-հիշողության մոդուլի համաշխարհային ծավալի 23 տոկոսը և դարձել տվյալ բաղադրիչների խոշորագույն սպառողը: Գործարքը Apple-ին կօգնի ապահովել բոլոր համակարգիչների և բջջային սարքավորումների համար կարևոր բաղադրիչների մատակարարման հուսալիություն:
Apple-ի ներկայացուցիչը հաստատել է գործարքի իրականացման փաստը, սակայն մանրամասները չի հայտնել: Դեկտեմբերին TechCrunch բլոգը գրել էր, որ բանակցությունների ժամանակ խոսվել է 400-500 միլիոն դոլարի մասին:
«Ժամանակ առ ժամանակ Apple-ը գնում է ոչ մեծ տեխնոլոգիական ընկերություններ, սակայն սովորաբար մենք չենք բացահայտում, թե ինչի համար է դա արվում»,- ընկերությունից հայտնել են Bloomberg-ին:
Anobit ընկերությունը հիմվել է 2006 թվականին: Anobit-ն արտադրում է ֆլեշ-հիշողության մոդուլներ սեփական MSP (Memory Signal Protection) տեխնոլոգիայի կիրառմամբ: 2011 թվականին ընկերությունը հայտնել էր 20 միլիոն ֆլեշ-վերահսկիչների վաճառքի մասին:
Anobit-ի գնումը Apple-ի առաջին ձեռքբերումն է Իսրայելում և առաջին նման գործարքը այն ժամանակից ի վեր, ինչ Թիմ Քուքը գլխավորեց ընկերությունը: